শিল্পী সাহিত্যিক গোকুল পাঠকলৈ মৰণোত্তৰভাৱে আৰু বৰ্ষীয়ান অভিনেত্ৰী নগাঁৱৰ প্ৰভা হাজৰিকালৈ অসম অনুসূচিত জাতি প্ৰাণ বঁটা

গুৱাহাটী,১৬ নৱেম্বৰ:বৰপেটাৰ মহীৰূহ তথা শিল্পী সাহিত্যিক গোকুল পাঠকলৈ মৰণোত্তৰ ভাবে আৰু বৰ্ষীয়ান অভিনেত্ৰী নগাঁৱৰ প্ৰভা হাজৰিকালৈ আগবঢ়োৱা হৈছে অসম অনুসূচিত জাতি প্ৰাণ বঁটা ৷ এই বঁটা আগবঢ়াইছে নৱ-প্ৰভাত নামৰ এটা এন জি অ'ই ৷ উল্লেখ্য যে , নৱ প্ৰভাত নামৰ এন জি অ'টোৱে যোৱা ৬ বছৰ ধৰি অসমত অনুসূচিত জাতিৰ একোগৰাকী মহান ব্যক্তি তথা মহিয়সী নাৰীক অনুসূচিত জাতিৰ সৰ্ব্বোচ্চ সন্মান হিচাপে "অসম অনুসূচিত জাতি প্ৰাণ বঁটা" আগবঢ়াই আহিছে ৷ 

আনহাতে , প্ৰশাসনিক, সাংস্কৃতিক,শৈক্ষিক, ব্যৱসায়িক, ৰাজনৈতিক আৰু সামাজিক ক্ষেত্ৰখনত নিজ নিজ কৰ্মৰাজীৰে এক সুকীয়া স্থান দখল কৰিবলৈ সক্ষম হোৱা অনুসূচিত জাতিৰ একোজনকৈ ব্যক্তিক "অসম অনুসূচিত জাতি গৌৰৱ বঁটা,অসম অনুসূচিত জাতি শিল্পী বটাঁ আৰু অসম অনুসূচিত জাতি যুৱ-প্ৰতিভা বটাঁ" প্ৰদান কৰি আহিছে এন জি অ'টোৱে ৷ এইবেলি অসমীয়া কলা-সংস্কৃতিৰ অন্যতম সাধক বিষ্ণুৰাভা বঁটাপ্ৰাপ্ত বৰপেটা জিলাৰ প্ৰয়াত গোকুল পাঠকক মৰণোত্তৰভাৱে আৰু অসমীয়া বোলছবি জগতৰ বৰ্ষীয়ান অভিনেত্ৰী নগাঁৱৰ প্ৰভা হাজৰিকালৈ আগবঢ়োৱা হৈছে অসম অনুসূচিত জাতি প্ৰাণ বঁটা ।

আনহাতে সংগীতশিল্পী দিলীপ দাস , পৰিচালক শোভেশ্বৰ দাস , সংগীত শিল্পী ময়ূখ হাজৰিকা আৰু সংগীত শিল্পী হীৰা দাসক অনুসূচিত জাতি শিল্পী বঁটা আগবঢ়োৱা হৈছে ৷ অসম চৰকাৰৰ কেবিনেট মন্ত্ৰী পীয়ুষ হাজৰিকা , আন্তৰ্জাতিক খ্যাতি সম্পন্ন খেলুৱৈ হিমা দাস আৰু সংবাদকৰ্মী উজ্জ্বল জ্যোতি দাসক অনুসূচিত জাতি যুৱ প্ৰতিভা বঁটা আগবঢ়াইছিল এই এন জি অ' টোৱে ৷