১১ দিনৰ বাবে হাঁহি নিষিদ্ধ হোৱা দেশখন, জনসাধাৰণে কঠোৰভাৱে পালন কৰিব লাগিব এই নিয়ম

গুৱাহাটী, ১৭ ডিচেম্বৰঃ উত্তৰ কোৰিয়াৰ একনায়ক কিম জং-উনৰ আন এক অদ্ভুত আদেশ পোহৰলৈ আহিছে। দেশখনৰ প্ৰাক্তন নেতা কিম জং-ইলৰ দশম মৃত্যু বাৰ্ষিকী উপলক্ষে এক জাননী জাৰি কৰি ৰাষ্ট্ৰপ্ৰধান গৰাকীয়ে কয় যে, "দেশখনৰ কোনো লোকে ১১ দিনৰ বাবে হাঁহিব নোৱাৰিব আৰু আনন্দৰ উৎসৱ উদযাপন কৰিব নোৱাৰিব।" এই ৰাষ্ট্ৰীয় শোকৰ সময়ত মানুহৰ হাঁহিৰ লগতে সুৰাপান কৰাও নিষিদ্ধ কৰা হৈছে। কিয়নো নিজ পিতৃ কিম জং-ইলৰ মৃত্যুবার্ষিকী উপলক্ষে তেওঁ কঠোৰ হৈ পৰিছে। 

উত্তৰ কোৰিয়াৰ জনসাধাৰণক ৰাষ্ট্ৰপ্ৰধান জনে আনকি ১৭ ডিচেম্বৰত সামগ্ৰী ক্ৰয় কৰাৰ অনুমতি দিয়া নাই। যিসকলে এই আদেশ পালন নকৰে তেওঁলোকৰ বিৰুদ্ধেক কঠোৰ ব্যৱস্থা গ্ৰহণ লোৱাৰ আহ্বান জনোৱা হৈছে। এটা সূত্ৰই কৈছিল যে অতীতত ৰাষ্ট্ৰীয় শোকৰ সময়ত হাঁহি-ফুৰ্টি কৰা বা সুৰাপান কৰা লোকসকলক গ্ৰেপ্তাৰ কৰা হৈছিল। আৰক্ষীয়ে গ্ৰেপ্তাৰ কৰা লোকসকলক কোনেও আৰু পুনৰ দেখিবলৈ সক্ষম হোৱা নাই।

ইপিনে, ৰাষ্ট্ৰপ্ৰধানৰ প্ৰতিবেদনখনত উল্লেখ কৰা হৈছে যে, যদি ৰাষ্ট্ৰীয় শোকৰ সময়ত কাৰোবাৰ মৃত্যু হয়, তেন্তে তেওঁৰ পৰিয়ালক জোৰেৰে কান্দিবলৈ অনুমতি দিয়া নহ'ব। একে সময়তে, যিসকল লোকৰ জন্মদিন এই সময়ছোৱাত আহে তেওঁলোকে সেইবোৰ উদযাপন কৰিব নোৱাৰে। যিসকলে অতীতত আদেশ উলংঘা কৰিছিল তেওঁলোক পুনৰ কেতিয়াও ঘূৰি অহা নাছিল। এইটোৱে বুজায় যে তেওঁলোকক হয় মৃত্যুদণ্ড দিয়া হৈছিল বা কাৰাগাৰত মৃত্যুৰ বাবে এৰি দিয়া হৈছিল। 

দক্ষিণ হোৱাংহোৰ দক্ষিণ-পশ্চিম প্ৰদেশৰ আন এটা সূত্ৰই কৈছিল যে, এই সময়চোৱাত আৰক্ষীক জনসাধাৰণৰ ওপৰত তীক্ষ্ণ নজৰ ৰাখিবলৈ কোৱা হৈছে। ৰাষ্ট্ৰীয় শোকৰ সময়ত, আৰক্ষীয়ে এনে যিকোনো ব্যক্তিক গ্ৰেপ্তাৰ কৰিব পাৰে যাক দুখী বা হতাশাগ্ৰস্ত দেখা নাযায়। এই ১১ দিনৰ ম্যাদটো আৰক্ষী বিষয়াসকলৰ বাবেও অসুবিধাজনক। কিয়নো যদি কোনোবাই আদেশ উলংঘা কৰা দেখা যায়, তেন্তে তেওঁলোকৰ বাবেও সঁহাৰি দিয়া কঠিন হৈ পৰে। ইয়াৰ ভয়ত, কৰ্তৃপক্ষই কেইবাদিনো শুব নোৱাৰে। সূত্ৰটোৱে কৈছিল যে নাগৰিক গোট আৰু চৰকাৰী কোম্পানীবোৰক ৰাষ্ট্ৰীয় শোকৰ সময়ছোৱাত দৰিদ্ৰ লোকসকলৰ বাবে খাদ্যৰ ব্যৱস্থা কৰিবলৈ কোৱা হৈছে। উল্লেখ্য যে উত্তৰ কোৰিয়াৰ প্ৰাক্তন নেতা কিম জং-ইলে ১৯৯৪ চনৰ পৰা ২০১১ চনৰ ১৭ ডিচেম্বৰলৈকে শাসন কৰিছিল। তেওঁৰ মৃত্যু ৰাষ্ট্ৰীয় শোক দিৱস হিচাপে পালন কৰা হয়। এই উপলক্ষে, প্ৰতি বছৰে, প্ৰাক্তন নেতাজনৰ পুত্ৰ কিম জং-উনে জনসাধাৰণৰ সুখক ১১ দিনৰ বাবে শোকলৈ পৰিণত কৰে।