নৱবৰ্ষত সুৰাপান ৰোধ আৰু অন্যান্য অভিযানৰ বাবে বিশেষ পদক্ষেপ মুখ্যমন্ত্ৰী ড° হিমন্ত বিশ্ব শৰ্মাৰ

গুৱাহাটী, ২৫ ডিচেম্বৰঃ মুখ্যমন্ত্ৰী ড° হিমন্ত বিশ্ব শৰ্মাই উপায়ুক্ত, আৰক্ষী অধীক্ষক, ডিটিঅ', সকলো জিলাৰ আবকাৰী অধীক্ষকসকলক ৩১ ডিচেম্বৰ আৰু নৱবৰ্ষৰ প্ৰাকমুহূৰ্তত সুৰাপান আৰু অন্যান্য অভিযানৰ ওপৰত কঠোৰ সতৰ্কতা অৱলম্বন কৰিবলৈ নিৰ্দেশ দিয়ে।

মুখ্যমন্ত্ৰী গৰাকীয়ে উপায়ুক্ত আৰু অন্যান্য বিষয়াসকলৰ সৈতে এক ভিডিঅ' কনফাৰেন্সত সুৰাপান কৰি গাড়ী চলোৱাৰ ঘটনা প্ৰতিহত কৰিবলৈ ৰাস্তাত পৰ্যাপ্ত নিষেধাজ্ঞা আৰোপ কৰিবলৈ কৈছিল।

লগতে মুখ্যমন্ত্ৰী গৰাকীয়ে উপায়ুক্তসকলক বিশেষকৈ ৩১ ডিচেম্বৰৰ নিশা অসমৰ জিলা অসামৰিক চিকিৎসালয় আৰু চিকিৎসালয়সমূহ পৰিদৰ্শন কৰিবলৈ আৰু চিকিৎসকৰ উপলব্ধতা আৰু পথ দুৰ্ঘটনাত পীড়িতসকলৰ বাবে তাৎক্ষণিক চিকিৎসা নিশ্চিত কৰিবলৈও নিৰ্দেশনা আগবঢ়ায়। তদুপৰি, স্বাস্থ্য সেৱাৰ যুটীয়া সঞ্চালকসকলক যিকোনো আৱশ্যকতা পূৰণ কৰিবলৈ এম্বুলেন্স সাজু কৰিবলৈ পৰামৰ্শ দিয়া হৈছে।

অসমৰ মুখ্যমন্ত্ৰী ড° শৰ্মাই কয়, "মানুহে উৎসৱৰ বতৰ উপভোগ কৰা উচিত। কিন্তু এই উপভোগ কৰিলে সীমা অতিক্রম কৰিব নালাগে। প্ৰতিটো জীৱন মূল্যৱান আৰু উপভোগৰ নামত, মূল্যৱান মানৱ জীৱন হেৰুৱাব নালাগে। সেয়েহে মই মটৰ চালকসকলক সুৰাপান আৰু গাড়ী চলোৱা পৰিহাৰ কৰিবলৈ আহ্বান জনাইছো।"