ভাৰতৰ বিকাশৰ কেন্দ্রবিন্দু হ'ব উত্তৰ-পূব অঞ্চল; দক্ষিণ-পূব ৰাষ্ট্ৰৰ সৈতে সংযোজিত হ'ব মণিপুৰ

গুৱাহাটী, ৪ জানুৱাৰীঃ প্ৰধানমন্ত্ৰী নৰেন্দ্ৰ মোদীয়ে মঙলবাৰে উত্তৰ-পূব ভ্ৰমণৰ সময়ত কয় যে, "মণিপুৰ আৰু উত্তৰ-পূব অঞ্চল ভাৰতৰ উন্নয়নমূলক অভিযানৰ কেন্দ্ৰবিন্দু হ'ব আৰু আন্তঃৰাষ্ট্ৰীয় বাণিজ্য বৃদ্ধিৰ বাবে ৰাজ্যখনৰ নিৰ্মাণাধীন ঘাইপথসমূহ দক্ষিণ-পূব এছিয়াৰ দেশসমূহৰ সৈতে সংযুক্ত কৰা হ'ব।"

প্ৰধানমন্ত্ৰী গৰাকীয়ে লগতে কয় যে "এক্ট ইষ্ট ড্ৰীম"ৰ অধীনত পৰ্যটন আৰু সংযোগ সম্পৰ্কীয় উচ্চাভিলাষী সকলো প্ৰকল্পসমূহ গুৰুত্বসহকাৰে ৰূপায়ণ কৰা হৈছে, আনহাতে অঞ্চলটোত শান্তি পুনৰুদ্ধাৰ কৰা হৈছে।" ইপিনে, ১৩ টা প্ৰকল্প উদ্বোধন কৰাৰ লগতে মুঠ ৪,৮১৫ কোটি টকাৰ বিনিয়োগেৰে ৯ টা প্ৰকল্পৰ আধাৰশিলা স্থাপন কৰাৰ পিছত ইম্ফলৰ হাপ্ত কাংজেইবুং খেলপথাৰত এক ৰাজহুৱা সমাৱেশক সম্বোধন কৰি মোদীয়ে কয়, "উত্তৰ-পূব অঞ্চলৰ শতাধিক উগ্ৰপন্থীয়ে হিংসাৰ পথ পৰিহাৰ কৰি উন্নয়নৰ মূল সুঁতিত যোগদান কৰিছে।

মণিপুৰ আৰু উত্তৰ-পূব অঞ্চলৰ পৰ্যটনৰ সম্ভাৱনা সকলো ধৰণৰ সংযোগৰ সৈতে সম্পূৰ্ণৰূপে ব্যৱহাৰ কৰা হৈছে। প্ৰধানমন্ত্ৰী হোৱাৰ আগতে মই মণিপুৰ ভ্ৰমণ কৰিছিলো আৰু তেতিয়া ৰাজ্যখনৰ পৰিস্থিতি প্ৰত্যক্ষ কৰিছিলো। ৰাজ্যখনত এতিয়া এক আমূল পৰিৱৰ্তন হৈছে। সমগ্ৰ ভাৰত চৰকাৰক মণিপুৰৰ লোকসকলৰ দুৱাৰমুখলৈ অনা হৈছিল। বহু সংখ্যক কেন্দ্ৰীয় মন্ত্ৰী আৰু নেতাই অঞ্চলটোৰ 'সেৱক' হিচাপে কাম কৰি আছে। পাঁচজন কেন্দ্ৰীয় মন্ত্ৰী এতিয়া অঞ্চলটোৰ পৰা আহিছে।"

আনহাতে, আন্তঃৰাষ্ট্ৰীয় ক্ৰীড়া ক্ষেত্ৰত মণিপুৰী যুৱক-যুৱতীসকলৰ সাফল্যৰ কথা উল্লেখ কৰি প্ৰধানমন্ত্ৰীয়ে কয় যে, "যুৱক-যুৱতীসকলে বিশেষকৈ ছোৱালীসকলে দেশৰ বাবে বিশেষ সন্মান কঢ়িয়াই আনিছে। কমনৱেলথ গেমছৰ পৰা অলিম্পিকলৈকে মণিপুৰী ল'ৰা-ছোৱালীয়ে আন্তঃৰাষ্ট্ৰীয় ক্ৰীড়া ক্ষেত্ৰত ভাৰতীয় পতাকা উত্তোলন কৰি আছে। কুস্তিৰ পৰা ধনুৰ্বিদ্যা, বক্সিং, ভাৰোত্তোলনলৈকে মণিপুৰৰ ল'ৰা-ছোৱালীয়ে যথেষ্ট সফলতাৰে প্ৰদৰ্শন কৰিছে। এম.চি মেৰী কম, মীৰাবাই চানু, বিমলা দেৱী, লাইশ্ৰাম সৰিতা দেৱী হৈছে মণিপুৰৰ সকলো ডাঙৰ ক্ৰীড়া ব্যক্তিত্বৰ ভিতৰত একোজনকৈ বিশেষ ব্যক্তি। ভাৰতীয় যুৱক-যুৱতীসকলে মণিপুৰী ক্ৰীড়া ব্যক্তিত্বৰ পৰা অনুপ্ৰেৰণা লৈছে।"

মোদীয়ে লগতে কয় যে, "মণিপুৰত আধুনিক ক্ৰীড়া বিশ্ববিদ্যালয় স্থাপনৰ লগে লগে সমগ্ৰ বিশ্বৰ ক্ৰীড়া জগতত ভাৰতীয় ক্ৰীড়া আৰু অধিক আগুৱাই যাব। এয়া মণিপুৰৰ মইৰাং আছিল য'ত প্ৰথমবাৰৰ বাবে ৰাষ্ট্ৰীয় পতাকা উত্তোলন কৰা হৈছিল (নেতাজী সুভাষ চন্দ্ৰ বসুৰ নেতৃত্বত ভাৰতীয় ৰাষ্ট্ৰীয় সেনাই) আৰু একেখন মণিপুৰ এতিয়া বিকাশৰ পথত আছে। ৰাষ্ট্ৰীয় পাম তেল খেতি অভিযানক বৃহৎ পৰিমাণে হাতত লোৱাৰ বাবে কেন্দ্ৰীয় চৰকাৰে এই খণ্ডত ভাৰতক 'আত্মনিৰ্ভৰ' হিচাপে গঢ়ি তুলিবলৈ ১১,০০০ কোটি টকাৰ আঁচনি হাতত লৈছে। মণিপুৰকে ধৰি উত্তৰ-পূব অঞ্চলটো পাম তেল খেতিৰ জৰিয়তে লাভান্বিত হ'ব।"

পূৰ্বৰ কংগ্ৰেছ চৰকাৰৰ নাম নোলোৱাকৈ প্ৰধানমন্ত্ৰীয়ে কয় যে মণিপুৰ আগতে 'অৱৰোধ ৰাজ্য' আছিল আৰু কিছুমান লোকে এতিয়াও সমস্যা সৃষ্টি কৰিবলৈ আৰু ৰাজ্যখনৰ উন্নয়নত বাধা দিবলৈ হিংসাৰ উসকানি দিবলৈ চেষ্টা কৰি আছে।

ইপিনে, প্ৰধানমন্ত্ৰীয়ে ১,৭০০ কোটি টকাৰ অধিক প্ৰকল্প ব্যয়ৰ ৰাষ্ট্ৰীয় ঘাইপথৰ আধাৰশিলা স্থাপন কৰে। ইয়াৰে প্ৰায় ১,১০০ কোটি টকা ব্যয়েৰে নিৰ্মাণ কৰা হ'ব ২,৩৫০ টা ম'বাইল টাৱাৰ আৰু ১৫০ বিচনাযুক্ত কৰ্কট চিকিৎসালয়ৰ ৰাজ্যিক প্ৰতিষ্ঠান। মোদীয়ে লগতে, নৱনিৰ্মিত ২০০ বিছনাযুক্ত ক'ভিড চিকিৎসালয়, থৌবাল বহুমুখী প্ৰকল্পৰ পানী পৰিবহন প্ৰণালী আৰু ৰাষ্ট্ৰীয় ঘাইপথ-৩৭ ৰ বৰাক নদীৰ ওপৰত এখন গুৰুত্বপূৰ্ণ দলং উদ্বোধন কৰে।