আন্তঃৰাষ্ট্ৰীয় সুনাম সম্পন্ন চিকিৎসা পাঠ্যক্ৰমৰ কিতাপত অসমৰ এগৰাকী বিশিষ্ট চিকিৎসক শ্ৰীমন্ত মাধৱ বৰুৱাৰ নাম অন্তৰ্ভুক্ত

তিনিচুকীয়া: ১১ ফেব্ৰুৱাৰী: অসমবাসী তথা ডিব্ৰুগড়বাসীৰ বাবে এটা ভাল খবৰ । "McMaster Text Book of Internal Medicine" কানাডাৰ হেমিল্টন বিশ্ববিদ্যালয়ে পোলেণ্ডৰ "Polish Institute of Evidence Based Medicine, Krakow." ৰ লগত যুটীয়া ভাবে প্ৰকাশ কৰা এখন আন্তঃৰাষ্ট্ৰীয় সুনাম সম্পন্ন চিকিৎসা পাঠ্যক্ৰমৰ কিতাপত অসমৰ এগৰাকী বিশিষ্ট চিকিৎসকৰ নাম অন্তৰ্ভুক্ত কৰিছে।

চিকিৎসক গৰাকী হৈছে ডিব্ৰুগড়ৰ ডাঃ শ্ৰীমন্ত মাধৱ বৰুৱা। তেখেতক এই পাঠ্যপুথি খনৰ দক্ষিণ পূব এছিয়া সংস্কৰণৰ এজন অন্যতম সম্পাদক হিচাপে মনোনীত কৰিছে। কিতাপ খনৰ দুটা অধ্যায় " Acute Opiod Toxicity " আৰু " Acute opioid withdrawal in the Emergency Department " ৰ লিখাৰ দায়িত্বও বিশিষ্ট চিকিৎসক ডাঃ শ্ৰীমন্ত মাধৱ বৰুৱাৰ ওপৰত অৰ্পণ কৰিছে। উল্লেখযোগ্য যে, ডাঃ শ্ৰীমন্ত মাধৱ বৰুৱা এগৰাকী সমাজসেৱক হিচাপে পৰিচয় দি দৰিদ্ৰজনৰ তথা আৰ্তজনৰ সহায় কৰি আহিছে।

ক'ভিডকালীন পৰিস্থিতিত অধিক সময় ধৰি দুৰ্গত সকলৰ কাষত থিয় হৈছিল। তেখেত বৰ্তমান ডিব্ৰুগড়স্থিত অসম চিকিৎসা মহাবিদ্যালয় হস্পিতালৰ মেডিচিন বিভাগৰ সহকাৰী প্ৰাধ্যাপক হিচাপে কৰ্মৰত হৈ আছে। তেখেতৰ এনে বতৰাই শুভাকাংখী ৰাইজক উৎফুল্লিত কৰি তুলিছে।