মহিলাই অনলাইনত অৰ্ডাৰ দিলে পৰঠা; পৰঠাৰ ভিতৰৰ ওলাল সাপৰ ছাল

গুৱাহাটী, ১১ মেঃ কেৰালাৰ তিৰুৱন্তপুৰমত, এগৰাকী মহিলাই তেওঁৰ খাদ্য বিতৰণ পাৰ্চেলত সাপৰ ছাল পোৱাৰ পিছত স্তম্ভিত হৈ পৰিছে। এই ঘটনাটো ৫ মে'ত সংঘটিত হৈছে, যেতিয়া প্ৰিয়া নামৰ এজন গ্ৰাহকে চান্থামুক্কুৰ শালিমাৰ হোটেলৰ পৰা পৰঠা অৰ্ডাৰ দিয়ে। যেতিয়া তেওঁ খাদ্যৰ পাৰ্চেলটো খুলি চাই, তেওঁ পেকেজটোৰ ভিতৰত সাপৰ ছালৰ এটা দীঘল টুকুৰা পাই, যিটো দেখি তেওঁ আচৰিত হৈ পৰে। 

তাৰ পিছত মহিলাগৰাকীৰ লগতে তেওঁৰ পৰিয়ালবৰ্গই লগে লগে এটা অভিযোগ দাখিল কৰে, যাৰ পিছত পৌৰ নিগমৰ কৰ্তৃপক্ষ আৰু আৰক্ষীয়ে বিষয়টো অনুসন্ধান আৰম্ভ কৰে। তিৰুৱন্তপুৰমৰ খাদ্য সুৰক্ষাৰ সহকাৰী আয়ুক্ত অনিল কুমাৰে কয় যে, "ৰেষ্টুৰেণ্টখন অস্থায়ীভাৱে বন্ধ কৰি দিয়া হৈছে। হোটেলৰ মালিকক হোটেলখন সম্পূৰ্ণ পৰিষ্কাৰ কৰাৰ পিছতহে খুলিবলৈ নিৰ্দেশ দিয়া হৈছে।"

ইপিনে, তুষাৰ কান্ত নাইক নামৰ এজন টুইটাৰ ব্যৱহাৰকাৰীয়ে এখন ফটো শ্বেয়াৰ কৰি লিখিছে, "এজন গ্ৰাহকে তেওঁৰ আহাৰত সাপৰ ছালৰ এটা অংশ পোৱাৰ পিছত কেৰালাৰ তিৰুৱন্তপুৰমৰ হোটেলখন অস্থায়ীভাৱে বন্ধ কৰি দিয়া হৈছে। পৰঠাখন বান্ধি অনা কাগজখনত সাপৰ ছাল পোৱা গৈছে, যাক পৰঠা পেক কৰিবলৈ ব্যৱহাৰ কৰা হয়। এই ঘটনাৰ পিছত খাদ্য সুৰক্ষা বিষয়াসকলক সতৰ্ক কৰা হৈছে।"

আনহাতে, নেদুমঙ্গদ চক্ৰৰ খাদ্য সুৰক্ষা বিষয়া অৰ্শিতা বছিৰে কয় যে, "আমি লগে লগে হোটেলখন পৰিদৰ্শন কৰিলোঁ। তাত অতি অস্বাস্থ্যকৰ পৰিৱেশত আহাৰ বনোৱা হয়। পাকঘৰত পৰ্যাপ্ত পোহৰ নাই আৰু বাহিৰত আৱৰ্জনা পেলোৱা দেখা গৈছে। ৰান্ধনীশালটো তৎক্ষণাৎ বন্ধ কৰা হৈছে আৰু কাৰণ দৰ্শোৱাৰ জাননী জাৰি কৰা হৈছে।"

"আমাৰ প্ৰাৰম্ভিক অনুসন্ধানটো হ'ল যে সাপৰ ছালখন খাদ্য পেক কৰিবলৈ ব্যৱহৃত বাতৰি কাকতত আছিল। বাকী থকা খাদ্যবোৰো পৰীক্ষাগাৰলৈ প্ৰেৰণ কৰা হৈছে আৰু ইয়াৰ প্ৰতিবেদনৰ ওপৰত ভিত্তি কৰি পৰৱৰ্তী পদক্ষেপ লোৱা হ'ব। আমাৰ বিভাগে খাদ্য সামগ্ৰী মেৰিয়াই দিয়াৰ বাবে বাতৰি কাকতৰ ব্যৱহাৰ নিষিদ্ধ কৰিছে।"