এনকাউণ্টাৰ কৰি বিপদত হায়দৰাবাদত আৰক্ষী,১০ জন আৰক্ষীৰ ওপৰত হত্যাৰ অভিযোগ উত্থাপন

গুৱাহাটী,২০ মে':তেলেংগানাৰ হায়দৰাবাদত আৰক্ষীৰ সংঘৰ্ষত নিহত হোৱা চাৰিজন দলবদ্ধ ধৰ্ষণকাৰী আৰু হত্যাৰ অভিযুক্তক আৰক্ষীয়ে ইচ্ছাকৃতভাৱে গুলীচালনা কৰা বুলি প্ৰতিপন্ন হৈছে।উচ্চতম ন্যায়ালয়ৰ দ্বাৰা নিযুক্ত আয়োগে আজি হায়দৰাবাদ আৰক্ষীৰ এনে আচৰণৰ ওপৰত এক প্ৰতিবেদন যোগ দি ১০ জন আৰক্ষীৰ ওপৰত হত্যাৰ অভিযোগ উত্থাপন কৰিছে। 

আয়োগে গোচৰটোৰ তদন্তত স্পষ্ট ত্ৰুটিবোৰো আঙুলিয়াই দিছিল আৰু অৱশেষত ১০ জন আৰক্ষীৰ ওপৰত হত্যাৰ অভিযোগ উত্থাপন কৰে।প্ৰতিবেদনখনত লগতে কোৱা হৈছে যে,"আমাৰ মতামত অনুসৰি,অভিযুক্তসকলক ইচ্ছাকৃতভাৱে বন্দুকেৰে গুলীচালনা কৰা হৈছিল।জোলু শিৱ, জোলু নবীন আৰু চিন্তুন্তা চেন্নাকেশাভুলু নাবালক আছিল।"

২০১৯ চনৰ নৱেম্বৰত এগৰাকী পশু চিকিৎসকক দলবদ্ধ ধৰ্ষণ আৰু হত্যাৰ সন্দৰ্ভত মহম্মদ আৰিফ, চিন্তকুন্তা চেন্নাকেশাভুলু, জোলু শিৱ আৰু জোলু নবীন নামৰ চাৰিজন অভিযুক্তক গ্ৰেপ্তাৰ কৰা হৈছিল।