মাঙ্কিপক্সক জৈৱিক অস্ত্ৰ হিচাপে গঢ়ি তুলিব বিচাৰিছিল ৰাছিয়াই: প্ৰকাশ পালে সকলো তথ্য

গুৱাহাটী, ২৩ মেঃ ইউক্রেইনৰ ওপৰত আক্ৰমণ আৰম্ভ কৰাৰ পৰা ৰাছিয়া বৰ্তমান সমগ্ৰ বিশ্ববাসীৰে দৃষ্টিত আছে। এই যুদ্ধৰ ফলত বিভিন্ন দেশে ৰাছিয়াৰ বিৰুদ্ধে থিয় দিছে। ইয়াৰ মাজতে এজন প্ৰাক্তন ছোভিয়েট বিজ্ঞানীয়ে দাবী কৰিছে যে ৰাছিয়াই ১৯৯০ ৰ দশকলৈকে মাঙ্কিপক্সক জৈৱিক অস্ত্ৰ হিচাপে ব্যৱহাৰ কৰাৰ পৰিকল্পনা কৰিছিল। 

প্ৰতিবেদন অনুসৰি, এই দাবী কানাত আলিবেকভে কৰিছে। তেওঁক কেনেথ আলিবেক বুলিও জনা যায়, যি ১৯৯১ চনত ছোভিয়েট ইউনিয়নৰ জৈৱিক অস্ত্ৰৰ বিশেষজ্ঞ আছিল। পিছত, তেওঁ আমেৰিকালৈ যোৱাৰ আগতে এবছৰ ৰাছিয়াত বাস কৰিছিল। 

আমেৰিকান ৰাসায়নিক আৰু জৈৱিক অস্ত্ৰ অপ্ৰসাৰণ প্ৰকল্পৰ (চিবিডব্লিউএনপি) সৈতে ১৯৯৮ চনত হোৱা এক সাক্ষাৎকাৰত, আলিবেকভে দাবী কৰিছিল যে, "ছোভিয়েট দেশৰ ভাইৰাছটো অস্ত্ৰ হিচাপে ব্যৱহাৰ কৰাৰ এক পৰিকল্পনা আছে। আলিবেকভে ৰাছিয়াৰ হৈ ৩২,০০০ কৰ্মচাৰীৰ সৈতে কাম কৰিছিল।"

ইয়াৰ লগতে আলিবেকভে কৈছিল যে, "মানুহৰ স্মলপক্সৰ পৰিৱৰ্তে এটা 'মডেল' ভাইৰাছ ব্যৱহাৰ কৰিব পাৰিনে নিৰ্ণয় কৰিবলৈ এক বিশেষ কাৰ্যসূচী বিকশিত কৰা হৈছে। আমি ভেকচিনিয়া ভাইৰাছ, মাউচপক্স ভাইৰাছ, ৰেবিটপক্স ভাইৰাছ আৰু মাঙ্কিপক্স ভাইৰাছক স্মলপক্সৰ আৰ্হি হিচাপে পৰীক্ষা কৰিছোঁ।"

তেওঁ লগতে কৈছিল, "এই ধাৰণাটো দৰাচলতে মডেল ভাইৰাছবোৰ ব্যৱহাৰ কৰি সকলো গৱেষণা আৰু বিকাশৰ কাম কৰা হ'ব। যাৰ এটা যোগাত্মক ফলাফল লাভ কৰিম। ইউ এছ এছ আৰ ৰ সমাপ্তিৰ পিছত, ৰাছিয়াৰ উত্তৰাধিকাৰী প্ৰতিৰক্ষা মন্ত্ৰালয়ে ভৱিষ্যতৰ জৈৱিক অস্ত্ৰ সৃষ্টিৰ বাবে মাঙ্কিপক্সৰ সৈতে কাম কৰি আছে।"

উল্লেখ্য যে, ১৯৫০ ৰ দশকত যেতিয়া দুটা বান্দৰক গৱেষণাৰ বাবে পৰীক্ষাগাৰত লৈ অহা হয়, তেতিয়া প্ৰথমে মাঙ্কিপক্স প্ৰাদুৰ্ভাৱে দেখা দিয়ে। ইয়াৰ প্ৰথম মানৱ গোচৰটো ১৯৭০ চনত কঙ্গো গণতান্ত্ৰিক গণৰাজ্যত চিনাক্ত কৰা হৈছে।