আইএএছ বিষয়াই কুকুৰ ফুৰাবলৈ অনাৰ বাবে সন্ধিয়াতেই বন্ধ কৰি দিয়া হয় এখন অত্যাধুনিক ষ্টেডিয়াম

গুৱাহাটী,২৬ মে':প্ৰতি সন্ধিয়া প্ৰায় ৭.৩০ বজাত দিল্লীৰ প্ৰধান সচিব (ৰাজহ) সঞ্জীৱ খিৰৱাৰে দিল্লী চৰকাৰৰ দ্বাৰা পৰিচালিত থ্যাগৰাজ ষ্টেডিয়ামত তেওঁৰ কুকুৰটোৰ সৈতে খোজ কাঢ়ে।সেইবাবে খেলুৱৈ আৰু প্ৰশিক্ষকসকলক সন্ধিয়া ৭ বজাৰ ভিতৰত প্ৰশিক্ষণ সামৰিবলৈ নিৰ্দেশ দিছিল ষ্টেডিয়াম প্ৰশাসকে।ইয়াকে লৈ সৃষ্টি হৈছে আন এক বিতৰ্কৰ।

এজন প্ৰশিক্ষকে ষ্টেডিয়াম প্ৰশাসকৰ এনে স্বভাৱক সমালোচনা কৰি কয়,"আমি আগতে লাইটৰ তলত নিশা ৮ বজাৰ পৰা ৮.৩০ বজালৈকে প্ৰশিক্ষণ কৰিছিলো। কিন্তু এতিয়া আমাক সন্ধিয়া ৭ বজাৰ ভিতৰত খেলপথাৰ এৰি যাবলৈ কোৱা হৈছে যাতে বিষয়াজনে তেওঁৰ কুকুৰটোক খোজ কঢ়াব পাৰে। ইয়াৰ বাবে আমাৰ প্ৰশিক্ষণ আৰু অনুশীলনৰ ৰুটিন যথেষ্ট ব্যাহত হৈছে।"

কমনৱেলথ গেমছৰ বাবে ২০১০ চনত নিৰ্মিত এই কমপ্লেক্সটোৱে ৰাজ্যিক আৰু ৰাষ্ট্ৰীয় পৰ্যায়ৰ খেলুৱৈসকলক যথেষ্ট আকৰ্ষিত কৰে। খেলুৱৈৰ অসুবিধাক লৈ নিয়মীয়াকৈ অভিযোগ কৰি আহিলেও আইএএছ খিৰৱাৰে কৈছিল যে এই অভিযোগটো সম্পূৰ্ণৰূপে ভুল আৰু ভুৱা।তেওঁ কেতিয়াবাহে তেওঁৰ কুকুৰটোলৈ খেলপথাৰত খোজ কাঢ়িছিল, ইয়ে খেলুৱৈসকলৰ অনুশীলনত ব্যাঘাত জন্মোৱা নাছিল।ইফালে ষ্টেডিয়াম প্ৰশাসক অজিত চৌধুৰীয়ে কৈছিল যে এই সিদ্ধান্ত কেৱল গৰমৰ বাবেহে লোৱা হৈছে।