কৰ্কট ৰোগ নিঃশেষ কৰিব পৰা বিশেষ ভাইৰাছবিধ, মানুহৰ ওপৰত কৰা হ'ল নিদানিক পৰীক্ষণ

গুৱাহাটী, ২৬ মেঃ শেহতীয়াকৈ, আমেৰিকাৰ এজন চিকিৎসকে এজন মানুহক এক নিদানিক পৰীক্ষণৰ সময়ত এটা ভাইৰাছৰ বেজী দিয়ে, যাৰ উদ্দেশ্য হৈছে শৰীৰৰ কৰ্কট কোষবোৰ ধ্বংস কৰা। এই ভাইৰাছে জন্তুৰ ওপৰত যোগাত্মক ফলাফল দেখুৱাইছে। গৱেষণা অনুসৰি, এই চিকিৎসাক অনকলাইটিক ভাইৰাছ থেৰাপী বুলি কোৱা হয়। 

অনকলাইটিক ভাইৰাছ হৈছে এক প্ৰকাৰৰ ইমিউনোথেৰাপী, যি কৰ্কট কোষবোৰ সংক্ৰমিত আৰু ধ্বংস কৰিবলৈ ভাইৰাছৰ ব্যৱহাৰ কৰে। বিশেষজ্ঞসকলে উল্লেখ কৰিছে যে, "ভাইৰাছে আমাৰ শৰীৰৰ কোষবোৰ সংক্ৰমিত কৰে আৰু তাৰ পিছত প্ৰতিলিপি কৰিবলৈ কোষৰ আনুবংশিক যন্ত্ৰ ব্যৱহাৰ কৰে। 

এই নতুন কৰ্কট ৰোগ নিঃশেষ কৰা ভাইৰাছবিধক ভেকচিনিয়া বুলি কোৱা হয়। এই ভাইৰাছবিধ কৰ্কট ৰোগৰ কোষবোৰ ধ্বংস কৰিবলৈ প্ৰস্তুত কৰা হৈছে। 

এক বিশেষ প্ৰতিবেদনত উল্লেখ কৰা হৈছে যে, "এই পৰীক্ষণটো সম্পূৰ্ণ হ'বলৈ আৰু প্ৰায় দুবছৰ সময় লাগিব। ইয়াৰ অধীনত সমগ্ৰ আমেৰিকা যুক্তৰাষ্ট্ৰত ১০০ জন কৰ্কট ৰোগীৰ ওপৰত পৰীক্ষা কৰা হ'ব। কৰ্কট গৱেষণা কোম্পানী ইমুজিন লিমিটেডৰ মতে, এই চিকিৎসাই কৰ্কট ৰোগৰ বিৰুদ্ধে মানুহৰ ৰোগ প্ৰতিৰোধ প্ৰণালীকো সহায় কৰিব পাৰে।

এই কোম্পানীটোৱে ভাইৰাছ ভেকছিন বিকশিত কৰি আছে। ইয়াৰ সম্পূৰ্ণ নাম হৈছে চি এফ ৩৩-এইচ এন আই এছ ভি এক্স আই এন আই এ (CF33-hNIS VAXINIA)।

টিউমাৰৰ বিৰুদ্ধে এই অনকলিটিক ভাইৰাছ থেৰাপী পৰীক্ষণৰ প্ৰথম পৰ্যায়ৰ পৰা, বিশেষজ্ঞসকলে আশা কৰে যে এই ভাইৰাছে কৰ্কট ৰোগৰ বিৰুদ্ধে শৰীৰৰ ৰোগ প্ৰতিৰোধ ক্ষমতা বৃদ্ধি কৰে।