ৰিপ্লেছমেণ্ট প্লেয়াৰ ৰজত পাতিদাৰৰ স্মৰণীয় ইনিংছে দিলে ৰয়েল চেলেঞ্জাৰ্ছ বাংগালোৰক বিজয়ৰ সোৱাদ

গুৱাহাটী,২৬ মে':ইণ্ডিয়ান প্ৰিমিয়াৰ লীগ-২০২২ৰ প্ৰথমখন এলিমিনেটৰত ৰজত পাতিদাৰে লক্ষ্ণৌৰ ষ্টাৰ বলাৰৰ বিৰুদ্ধে আক্ৰমণাত্মক বেটিং কৰি ৰয়েল চেলেঞ্জাৰ্ছ বাংগালোৰৰ বিজয়ত এক গুৰুত্বপূৰ্ণ ভূমিকা পালন কৰিছিল। তেওঁ মাত্ৰ ৫৪ টা বলত অপৰাজিত ১১২ ৰাণ কৰিছিল। 

অধিনায়ক ফাফৰ উইকেট সোনকালে পৰি যোৱাৰ পিছত ৰজতে খেলপথাৰত ফাৰ্ষ্ট ডাউন বেটছমেন হিচাপে প্ৰৱেশ কৰিছিল।প্ৰথমে তেওঁ বিৰাট কোহলীৰ সৈতে নিজৰ ইনিংছটো চম্ভালি লৈছিল আৰু তাৰ পিছত মুক্তভাৱে শ্বট খেলিছিল। তেওঁ ৭ টা চাৰি আৰু ২ টা ছয়ৰ সহায়ত ২৮ টা বলত অৰ্ধশতক সম্পূৰ্ণ কৰিছিল। তাৰ মাজতে বিৰাটে ৰাণৰ হাৰ বৃদ্ধি কৰিবলৈ গৈ আউট হৈছিল।কিন্তু ৰজতে নিজৰ সংযমতা বজাই ৰাখি ৪৯ টা বলত ১১ টা চাৰি আৰু ৬ টা ছয়ৰ সহায়ত নিজৰ শতক সম্পূৰ্ণ কৰিছিল।লক্ষণীয় কথা যে ৰজত পাতিদাৰ বাংগালোৰ দলত ৰিপ্লেছমেণ্ট প্লেয়াৰ হিচাপেহে প্ৰৱেশ কৰিছিল।