দিল্লীত আতচবাজীতকৈ বেছি বায়ু প্ৰদূষণ কৰে অন্য এক কাৰকে,দিল্লী আইআইটিৰ এক বিশেষ গৱেষণাত প্ৰকাশ

গুৱাহাটী,২৬ মে':উচ্চতম ন্যায়ালয়ে দেৱালীৰ আতচবাজীক দিল্লীৰ বায়ু প্ৰদূষণৰ মুখ্য কাৰক হিচাপে চিনাক্ত কৰাৰ পিছত ইণ্ডিয়ান ইনষ্টিটিউট অৱ টেকন'লজী,দিল্লী (আইআইটি,দিল্লী)ৰ শেহতীয়া গৱেষণাই দিলে কিছু পৃথক সিদ্ধান্ত।আইআইটি দিল্লীৰ বিভিন্ন বিভাগৰ গৱেষক ছাত্ৰৰ দ্বাৰা সম্পন্ন কৰা উক্ত গৱেষণাৰ অন্তত মূল দায়ী হিচাপে পৰিগণিত হ'ল অন্য এক কাৰক। গৱেষক ছাত্ৰ-ছাত্ৰী সকলে দেৱালীত দিল্লীৰ বিভিন্ন স্থানৰ পৰা লোৱা বায়ুৰ নমুনা পৰীক্ষা কৰিছিল আৰু সেইখিনি বায়ুত থকা বিভিন্ন কণিকাৰ অনুপাত জুখিছিল।

অধ্যয়নটোৰ অন্তত প্ৰকাশ হৈছিল যে আতচবাজীতকৈ বেছি বায়'মাছেহে ৰাষ্ট্ৰীয় ৰাজধানীৰ বায়ু প্ৰদূষণত আটাইতকৈ বেছি অৰিহণা যোগায়।গৱেষণা অনুসৰি শীতকালত বায়'মাছ জ্বলোৱাৰ ভিতৰত আছে খেতিৰ জুই,তাপৰ বাবে কাঠ জ্বলোৱা,পেলনীয়া সামগ্ৰীক দাহ কৰা ইত্যাদি।এই অধ্যয়নটো ৰাষ্ট্ৰীয় ৰাজধানী অঞ্চল (এনচিটি) দিল্লী কেন্দ্ৰিক আছিল আৰু ২০ অক্টোবৰ ২০১৯ ৰ পৰা ৩১ অক্টোবৰ ২০১৯ লৈ সম্পন্ন কৰা হৈছিল।