পি.পি.ই কিটক লৈ উত্তৰ দি আহৰি পোৱা নাই মন্ত্ৰীয়ে,চীনৰ পৰা অনা বুলি ঢোল বজাই বিপদত ৰাজ্য চৰকাৰ

গুৱাহাটী,২৯ মে':ৰাষ্ট্ৰীয় স্বাস্থ্য মিছন তথা স্বাস্থ্য বিভাগে চীনৰ পৰা কোনো পি পি ই কিট ক্ৰয় কৰা নাছিল । হয়তো কোনাবাই সাহায্য হিচাপে দিব পাৰে ৷ এই মন্তব্য স্বাস্থ্য মন্ত্ৰী কেশৱ মহন্তৰ । শনিবাৰে গুৱাহাটীত সাংবাদিকে সোধা এক প্ৰশ্নৰ উত্তৰত তেওঁ এইদৰে মন্তব্য কৰি লগতে কয় যে তেনে কোনো সামগ্ৰী ক্ৰয় কৰা নাছিল যেতিয়া দুৰ্নীতিৰ প্ৰশ্নই নুঠে ।সেই বিশেষ বিমানেৰে অন্য সামগ্ৰী অনা হৈছিল বুলি মন্তব্য স্বাস্থ্য মন্ত্ৰী কেশৱ মহন্তৰ । মনকৰিবলগীয়া কথা যে ২০২০ চনৰ ১৫ এপ্ৰিলত চীনৰ পৰা ৫০ হাজাৰ পি পি ই কিট লৈ অহা ব্লু ডাৰ্ট কুৰিয়াৰ ছাৰ্ভিছৰ এখন কাৰ্গো বিমানক আদৰিবলৈ অসমৰ বৰ্তমানৰ মুখ্যমন্ত্ৰী আৰু তেতিয়াৰ স্বাস্থ্যমন্ত্ৰী ড৹ হিমন্ত বিশ্ব শৰ্মা লোকপ্ৰিয় গোপীনাথ বৰদলৈ বিমান বন্দৰত উপস্থিত হৈছিল ৷

উক্ত বিমানখনত ৫০ হাজাৰ পি পি ই কিট আৰু অন্যান্য ক'ভিড প্ৰতিৰোধী সামগ্ৰী ৰাজ্য চৰকাৰে চীনৰ পৰা আমদানি কৰা বুলি উল্লেখ কৰি ড৹ শৰ্মাই কৈছিল যে চীনৰ পৰা পোনপটীয়াকৈ পি পি ই কিট ক্ৰয় কৰা অসম হৈছে ভাৰতৰ প্ৰথম ৰাজ্য ৷ কিন্তু শেহতীয়াকৈ ৰাষ্ট্ৰীয় স্বাস্থ্য অভিযান, অসমে (এন এইচ এম) এখন আৰ টি আই আবেদনৰ উত্তৰত জনায় যে অসমত চৰকাৰীভাৱে চীনৰ পৰা কোনো ধৰণৰ পি পি ই কিট বা অন্য ক'ভিড প্ৰতিৰোধী সামগ্ৰী ক্ৰয় কৰা হোৱা নাছিল৷

এই তথ্য পোহৰলৈ অহাৰ পিছতে ৰাজ্যৰ বিভিন্ন প্ৰান্তত প্ৰতিক্ৰিয়াৰ সৃষ্টি হোৱাৰ লগতে ৰাজনৈতিক মহলত চৰ্চা আৰম্ভ হৈছে ।

উল্লেখ্য যে শণিবাৰে জলবায়ু পৰিৱৰ্তন আৰু গোলকীয় উষ্ণতা বৃদ্ধি সন্দৰ্ভত গুৱাহাটী পৌৰ নিগমৰ বিশেষ সজাগতা আৰু পৰ্যালোচনা সভাত মন্ত্ৰী কেশৱ মহন্ত, মেয়ৰ মৃগেন শৰণীয়া, উপ-মেয়ৰ স্মিতা ৰয়ৰ লগতে জি এম চিৰ কাউঞ্চিলাৰসকল উপস্থিত থাকে । উজান বজাৰৰ জি.এম.চি সমন্বয় কক্ষত এই সভা অনুষ্ঠিত হয় । এই সভাত মন্ত্ৰী কেশৱ মহন্তই ৬০ টা ৱাৰ্ডত চিকিৎসালয় স্থাপন সন্দৰ্ভত মেয়ৰ আৰু পাৰিষদসকলৰ লগত প্ৰাৰম্ভিক পৰ্যালোচনা কৰে ।