গুৱাহাটীত প্ৰথমবাৰৰ বাবে অনুষ্ঠিত হ'ব নদীৰ সম্পদ-সম্ভাৱনীয়তা সন্দৰ্ভত আন্তঃৰাষ্ট্ৰীয় পৰ্যায়ৰ সন্মিলন

গুৱাহাটী,২৭ মে':নদীকেন্দ্ৰিক বিশাল ব্যৱসায়-বাণিজ্যকে ধৰি নদীৰ সম্পদ-সম্ভাৱনীয়তা সন্দৰ্ভত প্ৰথমবাৰৰ বাবে অনুষ্ঠিত হ'ব আন্তঃৰাষ্ট্ৰীয় পৰ্যায়ৰ সন্মিলন । এছিয়ান কনফ্লুয়েন্সৰ উদ্যোগত ২৮ আৰু ২৯ মে'ত গুৱাহাটীত অনুষ্ঠিত হ'ব 'নদী সন্মিলন'। মেঘালয়ৰ শ্বিলং আৰু বাংলাদেশৰ ঢাকাত অনুষ্ঠিত হোৱাৰ পিছত তৃতীয় সংস্কৰণ 'এছিয়ান কনফ্লুৱেন্স নদী সন্মিলন-২০২২' গুৱাহাটীত অনুষ্ঠিত হ'ব ।

বংগোপ উপসাগৰীয় আৰু দক্ষিণ-পূব এছিয়াৰ দেশসমূহৰ মাজত জল ব্যৱস্থাপনা, সংৰক্ষণ আৰু সম্পদ হিচাপে ব্যৱহাৰৰ প্ৰত্যাহ্বান আৰু সম্ভাৱনাসমূহক লৈ দুদিনীয়াকৈ গুৱাহাটীত অনুষ্ঠিত হ’ব নদী সন্মিলন । ভাৰত চৰকাৰৰ বৈদেশিক পৰিক্ৰমা মন্ত্ৰণালয় আৰু অসম চৰকাৰৰ এক্ট ইষ্ট নীতি পৰিক্ৰমা বিভাগ, উত্তৰ-পূব পৰিষদ আৰু অন্যান্য অংশীদাৰৰ সহযোগত এই সন্মিলনৰ আয়োজন কৰা হৈছে ।

অসম চৰকাৰৰ এক্ট ইষ্ট নীতি পৰিক্ৰমা বিভাগৰ সচিব মানবেন্দ্ৰ সিং আৰু এছিয়ান কনফ্লুৱেন্সৰ কাৰ্যবাহী সঞ্চালক সব্যসাচী দত্তই জানিবলৈ দিয়া মতে ‘নদী-3’ সন্মিলনৰ লক্ষ্য হৈছে উত্তৰ-পূৰ্বাঞ্চল আৰু অসমক কেন্দ্ৰবিন্দু হিচাপে লৈ বংগোপ উপসাগৰীয় অঞ্চল আৰু দক্ষিণ-পূব এছিয়াৰ সৈতে আঞ্চলিক সহযোগিতাৰে এক সামূহিক দৃষ্টিভংগী গ্ৰহণ কৰা ।

তবাংলাদেশ ফাউণ্ডেছন ফ'ৰ ৰিজিঅ'নেল ষ্টাডিজে সহযোগিতা আগবঢ়োৱা সন্মিলনখনত আন্তঃৰাষ্ট্ৰীয় প্ৰকৃতি সংৰক্ষণ সংঘ, আই আই টি গুৱাহাটী আৰু গুৱাহাটী বিশ্ববিদ্যালয়ে সমর্থন আগবঢ়াইছে । নদী সন্মিলনত হিমালয়ৰ দক্ষিণ অঞ্চলৰ পৰা গংগালৈকে, ব্ৰহ্মপুত্ৰৰ পৰা মেকঙলৈকে নদী অৱবাহিকাৰ সংলগ্ন অঞ্চলত সাধাৰণ প্ৰত্যাহ্বানসমূহ অতিক্ৰম কৰিবলৈ ৰাজনৈতিক সীমাৰ বাহিৰত প্ৰয়োজন হোৱা ঘনিষ্ঠ সহযোগিতা সন্দৰ্ভত আলোচনা হ'ব ।

নদীৰ সম্পদ-সম্ভাৱনীয়তাকলৈ গুৱাহাটীত দুদিনীয়া আন্তঃৰাষ্ট্ৰীয় 'নদী সন্মিলন'সন্মিলনখন ২৮ মে'ৰ পুৱা ৯.৩০ বজাত গুৱাহাটীৰ ৰেডিচন ব্লু হোটেলত আনুষ্ঠানিকভাৱে উদ্বোধন কৰা হ’ব । অনুষ্ঠানত ভাৰতৰ বৈদেশিক পৰিক্ৰমা মন্ত্ৰী ড৹ এছ জয়শংকৰ, বাংলাদেশৰ বৈদেশিক মন্ত্রী ড৹ এ কে আব্দুল মমেন, থাইলেণ্ডৰ বৈদেশিক পৰিক্ৰমা মন্ত্ৰী ডন প্ৰমুৱাইনাই, অসমৰ মুখ্যমন্ত্ৰী ড৹ হিমন্ত বিশ্ব শৰ্মা, উদ্যোগমন্ত্ৰী চন্দ্ৰমোহন পাটোৱাৰীয়ে অংশগ্ৰহণ কৰিব ।