প্ৰেমিকাক বিয়া কৰাবলৈ বিক্ৰেতা হৈছিল কন্ঠশিল্পী কেকে; এক অনন্য প্ৰেমকাহিনী

গুৱাহাটী, ২ জুনঃ কন্ঠশিল্পী কেকেৰ সম্পূৰ্ণ নাম আছিল কৃষ্ণ কুমাৰ কুন্নাথ। তেওঁ ১৯৯১ চনত তেওঁৰ শৈশৱৰ প্ৰেমিকা জ্যোতি লক্ষ্মী কৃষ্ণক বিয়া কৰাইছিল। অৱশ্যে, বিবাহৰ সময়ত কে.কে. নিবনুৱা আছিল। তেওঁ জ্যোতিক বিয়া কৰাবলৈ এজন বিক্ৰেতাৰ কাম কৰিছিল।

এই কথাটো গায়কজনে নিজেই এক বাস্তৱধৰ্মী অনুষ্ঠানত প্ৰকাশ কৰিছিল। কে.কে.-য়ে কৈছিল যে, "জ্যোতিক বিয়া কৰাবলৈ, মই এজন বিক্ৰেতাৰ কাম কৰিছিলোঁ। মোৰ শহুৰে বিচাৰিছিল যে মই এটা ভাল কাম কৰোঁ, তাৰ পিছতহে আমাক বিবাহ কৰিব অনুমতি দিব।"

ইয়াৰ ওপৰিও, কে.কে.-য়ে কৈছিল যে, "মই ৩ মাহৰ বাবে বিক্ৰেতাৰ চাকৰি কৰি এৰি দিছিলো আৰু তাৰ পিছত বিচলিত হৈ পৰিছিলো। ইয়াৰ পিছত মোৰ পত্নী জ্যোতিয়ে মোক সমৰ্থন কৰিছিল আৰু মোক সংগীতৰ জগতত বিশেষ নাম গঢ়ি তোলাত অৰিহণা যোগাইছিল।

মই মোৰ জীৱনত মাত্ৰ এজনী ছোৱালীৰ সৈতে ব্যক্তিগত সময় কটাইছিলো আৰু সেই ছোৱালীজনী আছিল মোৰ পত্নী জ্যোতি। আমি দুয়ো ষষ্ঠ শ্ৰেণীত লগ পাইছিলো। মই তেতিয়া বৰ লাজকুৰীয়া স্বভাৱৰ আছিলোঁ। মই জ্যোতিক সঠিকভাৱে মাতিব বা কথা পাতিব পৰা নাছিলো। মোৰ ল'ৰা ছোৱালীয়ে কেতিয়াবা মোৰ এই কথাবোৰ শুনি মোক জোকাইছিল।"

ইপিনে, জনপ্ৰিয় কন্ঠশিল্পী গৰাকীৰ কথা ক'বলৈ গ'লে কেকেৰ প্ৰথম এলবাম 'পাল' ১৯৯৯ চনত মুক্তি পাইছিল। তাৰ পিছত তেওঁ কেতিয়াও পিছলৈ ঘূৰি চোৱা নাছিল। এই গানটো হিট হোৱাৰ পিছত, তেওঁ বলীউডৰ পৰা প্ৰস্তাৱ লাভ কৰিবলৈ আৰম্ভ কৰিলে। তেওঁ নিজৰ কেৰিয়াৰত বহুতো হিট গান অনুৰাগীক উপহাৰ দিছে।

তেওঁ নিজৰ কেৰিয়াৰৰ বাবে দিল্লীৰ পৰা মুম্বাইলৈ স্থানান্তৰিত হৈছিল। কেকে-য়ে তেওঁৰ কেৰিয়াৰত কেৱল হিন্দীতে নহয়, তামিল, তেলেগু, কানাড়া, মাৰাঠী, মালায়ালম, গুজৰাটী, বাংলা আৰু অসমীয়া ভাষাতো গান গাইছে।