চি পি আৰ কি? যাক সঠিক সময়ত পালে ৰক্ষা পৰিল হেঁতেন কেকেৰ জীৱন

গুৱাহাটী, ৪ জুনঃ বলীউডৰ বিখ্যাত গায়ক কৃষ্ণকুমাৰ কুন্নাথৰ (কেকে) মৰণোত্তৰ পৰীক্ষা কৰা চিকিৎসকজনে বৃহস্পতিবাৰে জনাইছিল যে তেওঁৰ হৃদযন্ত্ৰৰ ধমনীত কেইবাটাও বাধা আছে আৰু যদি তেওঁক সময়মতে চিপিআৰ দিয়া হ'লহেঁতেন , তেন্তে তেওঁৰ জীৱন ৰক্ষা কৰিব পৰিলেহেঁতেন। কে.কে.ৰ মৃত্যুৰ বাবে তেওঁৰ অনুৰাগীসকল হতবাক হৈ পৰিছে, কোনেও আশা কৰা নাছিল যে হঠাতে এনেকুৱা কিবা হঠাতে ঘটিব।

গায়ক কেকেৰ যোৱা মঙলবাৰে নিশা হৃদৰোগত আক্ৰান্ত হোৱাৰ ফলত মৃত্যু হৈছিল। ইয়াৰ কেইঘণ্টামান আগতে, তেওঁ কলিকতাৰ 'নজৰুল মঞ্চ'ত এটা লাইভ কনচাৰ্ট কৰিছিল। এক বিশেষ প্ৰতিবেদনত নাম প্ৰকাশ কৰিবলৈ অনিচ্ছুক এজন চিকিৎসকে কৈছে যে, কেকেৰ বাওঁফালৰ কৰোনেৰী ধমনীত ডাঙৰ অৱৰোধ আছিল আৰু আন কিছুমান ধমনীকে ধৰি উপ-ধমনীবোৰত সৰু অৱৰোধ আছিল। লাইভ প্ৰদৰ্শনৰ সময়ত তেওঁ অতি উৎসাহিত হৈছিল, যাৰ ফলত তেজৰ যোগান বন্ধ হৈছিল আৰু হৃদৰোগত  আক্ৰান্ত হৈ তেওঁৰ মৃত্যু হৈছিল। 

ইপিনে, চিপিআৰ হৈছে কাৰ্ডিওপালমোনাৰী ৰিচাচিটেচন, অচেতন ৰোগীৰ বুকুত চাপ প্ৰয়োগ কৰা হয় আৰু কৃত্ৰিম প্ৰক্ৰিয়াৰে শ্বাস-প্ৰশ্বাস যোগান ধৰা হয়, যাতে হাঁওফাঁওত অক্সিজেনৰ অভাৱ নহয়।

ইয়াৰ দ্বাৰা, হৃদৰোগ আৰু শ্বাস-প্ৰশ্বাসত কষ্ট হ'লে এজন ব্যক্তিৰ জীৱন ৰক্ষা কৰিব পাৰি। জৰুৰীকালীন অৱস্থাত দিয়া চিপিআৰক এক উৎকৃষ্ট প্ৰাথমিক চিকিৎসা হিচাপে গণ্য কৰা হয়। এয়া হৈছে এক পৰীক্ষিত পদ্ধতি যি প্ৰায়ে উশাহ লোৱাত সমস্যা হোৱা লোকসকলৰ জীৱন ৰক্ষা কৰিছে।

যদি এজন ব্যক্তিৰ উশাহ বা হৃদস্পন্দন বন্ধ হয়, তেনেহ'লে পৰ্যাপ্ত অক্সিজেন অবিহনে, শৰীৰৰ কোষবোৰ দ্ৰুতগতিত মৰিবলৈ আৰম্ভ কৰে, অৰ্থাৎ সেই ব্যক্তিজন লাহে লাহে মৃত্যুৰ ফালে আগবাঢ়ি যায়। ইয়াৰ প্ৰভাৱ পোনপটীয়াকৈ মগজুৰ ওপৰত পৰে, যাৰ ফলত মৃত্যু হয়। সঠিক সময়ত চিপিআৰ দিয়া হ'লে জীৱন ৰক্ষা কৰিব পাৰি।

চিপিআৰ ঔষধ নহয়। এয়া এক প্ৰকাৰৰ জীৱন ৰক্ষা কৰা প্ৰক্ৰিয়া। ইয়াত, যদি ব্যক্তি এজনৰ উশাহ বন্ধ হয়, তেন্তে মানুহজনক স্বাভাৱিক স্থিতিলৈ ঘূৰাই অনালৈকে বুকুখনত হাতেৰে একেৰাহে হেঁচি থকা হয়। কিন্তু বেছিভাগ মানুহে এই পদ্ধতিটো নাজানে আৰু ব্যৱহাৰ কৰিব নোৱাৰে। যদি এই প্ৰক্ৰিয়াটো গায়ক কে.কে.-ৰ সৈতে ব্যৱহাৰ কৰা হ'লহেঁতেন, তেন্তে তেওঁ আজি সংগীতেৰে সকলোকে মন্ত্ৰমুগ্ধ কৰি থাকিলহেঁতেন।