উশাহৰ জৰিয়তে দিয়া ক'ভিড ভেকছিন প্ৰস্তুত কৰি উলিয়ালে বিজ্ঞানীয়ে

গুৱাহাটী, ১৫ ফেব্ৰুৱাৰীঃ প্ৰতিদিনে ক'ভিড সম্পৰ্কে বিভিন্ন ধৰণৰ গৱেষণা তথা অধ্যয়নৰ তথ্য প্ৰকাশ পাই আহিছে। বিজ্ঞানীসকলে ক'ভিড ভেকছিন প্ৰস্তুত কৰি যথেষ্ট সকাহ প্ৰদান কৰিছে। ভাৰততো বেছিভাগ লোকে ক'ভিডৰ ভেকছিন গ্ৰহণ কৰিছে। ভেকছিন লোৱা লোকসকলে নিশ্চয় বেজীৰ জৰিয়তে ভেকছিন গ্ৰহণ কৰিছে। কিন্তু কানাডাৰ মেকমাষ্টাৰ বিশ্ববিদ্যালয়ৰ বিজ্ঞানীসকলে নাকৰে লোৱা ক'ভিড ভেকছিন এটা প্ৰস্তুত কৰি উলিয়াইছে।

‘চেল’ আলোচনীত শেহতীয়াকৈ প্ৰকাশিত এক অধ্যয়নত এই উশাহৰ জৰিয়তে দিয়া ভেকছিন বিধৰ কথা উল্লেখ কৰা হৈছে। এই অধ্যয়ন অনুসৰি, মেকমাষ্টাৰ বিশ্ববিদ্যালয়ৰ বিজ্ঞানীসকলে দাবী কৰিছে যে, "এই নতুন উশাহত লোৱা ভেকছিনবিধ ক'ভিডৰ সকলো প্ৰকাৰৰ বিৰুদ্ধে কাৰ্যকৰী হিচাপে প্ৰমাণিত হ'ব। এই ভেকছিনটো উশাহৰ জৰিয়তে মানুহক দিয়া হ'ব, সেয়েহে ইয়াক এৰোচ'ল ভেকছিন বুলিও কোৱা হয়। ক'ৰনাৰ পৰা সুৰক্ষা দিবলৈ, ই পোনপটীয়াকৈ হাঁওফাঁও আৰু শ্বাসনলীক লক্ষ্য কৰি ল'ব। সেয়েহে ই কাৰ্যকৰী হিচাপে প্ৰমাণিত হ'ব পাৰে।"

ইপিনে, আলোচনীখনত কোৱা হৈছে যে, "এইটো জন্তুৰ আৰ্হিৰ ওপৰত আধাৰিত এটা অধ্যয়ন।" ইয়াক প্ৰস্তুত কৰা গৱেষকসকলে কয়, "বেছিভাগ ভেকছিনে ক'ৰনাৰ স্পাইক প্ৰ'টিনক লক্ষ্য কৰে যাৰ জৰিয়তে ই শৰীৰত প্ৰৱেশ কৰে। যদি প্ৰকাৰবোৰ সলনি কৰা হয় তেন্তে ভেকছিনটো কম কাৰ্যকৰী হিচাপে প্ৰমাণিত হ'ব পাৰে, কিন্তু আমাৰ ভেকছিনে ভাইৰাছৰ বিভিন্ন অংশক লক্ষ্য কৰে। আমি দাবী কৰোঁ যে এই ভেকছিনে এক বিশেষ প্ৰকাৰৰ ৰোগ প্ৰতিৰোধ ক্ষমতা বিকশিত কৰে, যি ক'ৰনাৰ পৰা যথেষ্ট পৰিমাণে সুৰক্ষা প্ৰদান কৰিব।"

গৱেষকসকলৰ মতে, উশাহত লোৱা ভেকছিনত ঔষধৰ খুব কম পালিৰ প্ৰয়োজন হ'ব। গৱেষকসকলে লগতে কৈছে যে, "এই ভেকছিনবিধত বৰ্তমানৰ বেজীৰে দিয়া ভেকছিন পালিৰ মাত্ৰ ১ শতাংশ পালিয়ে যথেষ্ট হ'ব।"