কাৰবি আংলং জিলাৰ শ্বহীদ পৰিয়াল আৰু এপিএছচি মূল পৰীক্ষাত অৱতীৰ্ণ হ’বলগীয়া প্ৰাৰ্থীসকলক এককালীন সাহায্য

গুৱাহাটী,১৫ ফেব্ৰুৱাৰী:কাৰবি আংলং জিলাৰ শ্বহীদ পৰিয়াল আৰু এপিএছচি মূল পৰীক্ষাত অৱতীৰ্ণ হ’বলগীয়া প্ৰাৰ্থীসকলক কাৰবি আংলং স্বায়ত্তশাসিত পৰিষদৰ তৰফৰ পৰা আগবঢ়োৱা হৈছে এককালীন সাহায্য ৷ প্ৰাপ্ত খবৰ অনুসৰি স্বায়ত্তৰাজ্য দাবী আন্দোলন আৰু বিভিন্ন সময়ত কাৰবি আংলং জিলাত সংঘটিত হোৱা ভাতৃঘাতী সংঘৰ্ষত প্ৰাণ হেৰুৱা লোকসকলৰ পৰিয়ালক পাঁচ লাখ টকাকৈ এককালীন সাহায্য প্ৰদান কৰা হৈছে ৷

আজি কাৰবি আংলং স্বায়ত্তশাসিত পৰিষদৰ নতুন সচিবালয়ৰ আলোচনা কক্ষত আয়োজিত হোৱা এক বিশেষ অনুষ্ঠানত ৩৮টা শ্বহীদ পৰিয়ালৰ মাজত এই এককালীন সাহায্যৰ চেকসমূহ প্ৰদান কৰা হয় ৷ লগতে এপিএছচি পৰীক্ষাত জিলাখনৰ পৰা মূল পৰীক্ষাৰ বাবে নিৰ্বাচিত হোৱা ৬৫ জন জনজাতি (পাৰ্বত্য) প্ৰাৰ্থীৰ বাবেও মূল পৰীক্ষাত অৱতীৰ্ণ হোৱাৰ বাবে প্ৰয়োজন হোৱা যাতায়ত তথা অনান্য যাৱতীয় খৰছৰ বাবদ পৰিষদৰ তৰফৰ পৰা আৰ্থিক সাহায্য প্ৰদান কৰা হয় ৷

কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলুৰাম ৰংহাং উক্ত অনুষ্ঠানত উপস্থিত থাকি সাহায্যসমূহ প্ৰদান কৰে ৷ অনুষ্ঠানটোত সাংসদ হৰেণছিং বে’, বিধায়ক বিদ্যাছিং ইংলেং, ৰূপছিং টেৰণেকে ধৰি পৰিষদৰ কেইবাগৰাকীও কাৰ্যবাহী সদস্য আৰু সদস্য উপস্থিত থাকে ৷