উত্তৰ-পূৰ্বাঞ্চলৰ ৰাজ্যিক মন্ত্ৰী সকলৰ সৈতে মিলিত হ'ল কেন্দ্ৰীয় জল শক্তি মন্ত্ৰী গজেন্দ্ৰ সিং শ্বেখাৱত

গুৱাহাটী,২৮ ফেব্ৰুৱাৰী:   জলজীৱন মিছন আৰু স্বচ্ছ ভাৰত মিছন (গ্ৰামীণ) আঁচনিৰ গুৰুত্বপূৰ্ণ দিশসমূহত আলোকপাত কৰাৰ লগতে ইয়াৰ অগ্ৰগতি, বৰ্তমানৰ ৰূপায়ণ তথা ভৱিষ্যতৰ  কাৰ্যপন্থা সম্পৰ্কে পৰ্যালোচনাৰ অৰ্থে এই মিছনৰ কাৰ্যসূচী ৰূপায়ণৰ দায়িত্বত থকা উত্তৰ পূৰ্বাঞ্চলৰ ৰাজ‍্যিক মন্ত্ৰীসকলৰ এখন এদিনীয়া সন্মিলন আজি গুৱাহাটীৰ প্ৰশাসনিক পদাধিকাৰী মহাবিদ্যালয়ত অনুষ্ঠিত হৈ যায়।

জল শক্তি বিভাগৰ কেন্দ্ৰীয় মন্ত্ৰী শ্ৰীগজেন্দ্ৰ সিং শেখাৱত, জল শক্তি বিভাগৰ খোৱাপানী আৰু অনাময় বিভাগৰ সচিব শ্ৰীমতী ৱিনি মহাজনকে ধৰি ৰাষ্ট্ৰীয় জল জীৱন মিছনৰ আন প্ৰতিনিধিসকলৰ লগতে অৰুণাচল প্ৰদেশ, মেঘালয় আৰু অসমৰ জনস্বাস্থ‍্য-কাৰিকৰী বিভাগৰ ৰাজ‍্যিক মন্ত্ৰীসকলৰ লগতে সেই ৰাজ্য কেইখনৰ সংশ্লিষ্ট বিভাগৰ প্ৰশাসনিক সচিবসকল, মিছন সঞ্চালকসকল,  মুখ্য অভিযন্তাসকল, আৰু আন নডেল বিষয়াসকল উপস্থিত থকা এই সভা অনলাইন যোগে লাইভ কৰা হয় আৰু উত্তৰ পূৰ্বাঞ্চলৰ সকলো কেইখন ৰাজ‍্যৰ জনস্বাস্থ‍্য কাৰিকৰী বিভাগৰ  কনিষ্ঠ অভিযন্তাৰ পৰা আৰম্ভ কৰি সহকাৰী অভিযন্তা, কাৰ্যবাহী অভিযন্তা, অধীক্ষক অভিযন্তা  আৰু  অতিৰিক্ত মুখ্য অভিযন্তা সকলে এই সন্মিলনত অনলাইন যোগে যোগদান কৰে। 

অসম চৰকাৰৰ অতিৰিক্ত মুখ্য সচিব শ্ৰী এছ আব্বাছিয়ে তেওঁৰ আদৰণি ভাষণত এই আঁচনিৰ অসমত এই পৰ্যন্ত লাভ কৰা সফলতা তথা ভৱিষ্যত পৰিকল্পনা সম্পৰ্কে উল্লেখ কৰে। এই সন্মিলনত সংশ্লিষ্ট সকলোৱে অভিজ্ঞতাৰ আদান-প্ৰদানৰ জৰিয়তে ন ন কথা শিকিবলৈ পাব আৰু  ই ভৱিষ্যত কাৰ্যপন্থা নিৰ্ণয়ৰ ক্ষেত্ৰত সহায় কৰিব বুলিও তেওঁ আশা প্ৰকাশ কৰে।  

ভাৰত চৰকাৰৰ খোৱা পানী আৰু অনাময় বিভাগৰ সচিবে তেওঁৰ ভাষণত জল জীৱন মিছন আৰু স্বচ্ছ ভাৰত মিছন (গ্ৰামীণ)  কাৰ্যকৰী কৰাৰ ক্ষেত্ৰত এই সন্মিলনৰ লক্ষ্য আৰু উদ্দেশ্যৰ বিষয়ে আঙুলিয়াই দিয়ে।  

 
কেন্দ্ৰীয় মন্ত্ৰী শ্ৰী গজেন্দ্ৰ সিং শেখাৱতে তেওঁৰ উদ্বোধনী ভাষণত দীৰ্ঘদিনীয়া বহনক্ষমতা, দক্ষতা বিকাশ, জনসাধাৰণৰ সক্ৰিয় অংশগ্ৰহণ, সেৱা প্ৰদানৰ বাবে  নতুন প্ৰযুক্তিৰ ব‍্যৱহাৰ, নিৰীক্ষণ আৰু অভিযোগ নিষ্পত্তিৰ কাৰ্যকৰী ব‍্যৱস্থাৰ ওপৰত গুৰুত্ব আৰোপ কৰি এই দুয়োখন আঁচনি সময়মতে ৰূপায়িত কৰাৰ প্ৰয়োজনীয়তা সম্পৰ্কে উল্লেখ কৰে । কেন্দ্ৰীয় জল শক্তি বিভাগৰ মন্ত্ৰীগৰাকীয়ে সভাপতিত্ব কৰা প্ৰথম সত্ৰত ৰাষ্ট্ৰীয় জল জীৱন মিছনৰ যুটীয়া সচিব আৰু পৰিচালন সঞ্চালক শ্ৰী অৰুণ বাৰোকা , আই এ এছে উত্তৰ পূৰ্বাঞ্চলৰ আটাইকেইখন ৰাজ‍্যতে এই দুই মিছনৰ  এক বিতং আৰু শেহতীয়া খতিয়ান দাঙি ধৰে।  

কেন্দ্ৰীয় মন্ত্ৰী গৰাকীয়ে উত্তৰ পূৰ্বাঞ্চলৰ ৰাজ‍্যকেইখনত জল জীৱন মিছন আৰু স্বচ্ছ ভাৰত মিছন (গ্ৰামীণ) উভয়ৰে ৰূপায়ণ আৰু অগ্ৰগতিৰ বুজ লৈ ৰূপায়ণৰ ক্ষেত্ৰত কেইটামান নিৰ্দিষ্ট বিষয়ত উদ্বেগ প্ৰকাশ কৰে। পৰৱৰ্তী সময়ত  অৰুণাচল প্ৰদেশ, মেঘালয় আৰু অসমৰ মন্ত্ৰীসকলৰ লগতে  উক্ত সন্মিলনত অংশগ্ৰহণ কৰা অন্য মন্ত্ৰী তথা বিষয়ববীয়াৰ সৈতে সংশ্লিষ্ট বিভাগসমূহৰ মুৰব্বীসকলৰ মাজত পাৰস্পৰিক আলোচনা অনুষ্ঠিত হয়।

এই আলোচনাত ৰাজ্য কেইখনত এই দুয়োখন আঁচনি  ৰূপায়ণৰ অগ্ৰগতিৰ ক্ষেত্ৰত থকা বিভিন্ন সমস্যাৰ ওপৰত সবিস্তাৰে আলোচনা কৰা হয়। জল জীৱন মিছন আৰু স্বচ্ছ ভাৰত মিছন (গ্ৰামীণ)ৰ  নিৰ্দ্ধাৰিত লক্ষ্য নিৰ্দিষ্ট সময়ত পূৰণ কৰাৰ বাবে হাতত ল'বলগীয়া কাৰ্য্যপন্থা সম্পৰ্কেও কেন্দ্ৰীয় মন্ত্ৰীগৰাকীয়ে  তেওঁৰ ভাষণত উল্লেখ কৰে। লগতে সংবাদ মাধ্যমৰ আগত কেন্দ্ৰীয় মন্ত্ৰীগৰাকীয়ে অসম তথা উত্তৰ পূৰ্বাঞ্চলত তীব্ৰ গতিৰে হৈ থকা কামৰ প্ৰশংসা কৰে।