ৰাষ্ট্ৰপতি ৰামনাথ কোবিন্দক বৃন্দাৱনী বস্ত্ৰৰ আলোকচিত্ৰ উপহাৰ

গুৱাহাটী,২৫ ফেব্ৰুৱাৰী:তিনিদিনীয়া ভ্ৰমণসূচীৰে শুকুৰবাৰে পুৱা অসমত উপস্থিত হয় ৰাষ্ট্ৰপতি ৰামনাথ কোবিন্দ। ৰাষ্ট্ৰপতি ৰামনাথ কোবিন্দে গুৱাহাটীৰ বৰঝাৰৰ বিমান বন্দৰত অৱতৰণ কৰাৰ পাছত ৰাজ্যপাল প্ৰফেছৰ জগদীশ মুখী আৰু মুখ্যমন্ত্ৰী হিমন্ত বিশ্ব শৰ্মাই আদৰণি জনায় ৰাষ্ট্ৰপতিগৰাকীক । ৰাষ্ট্ৰপতিগৰাকী গুৱাহাটীত উপস্থিত হৈয়ে বিমান বন্দৰৰ পৰা পোনে পোনে কামাখ্যা মন্দিৰলৈ যায় । মা কামাখ্যা মন্দিৰত পূজা-অৰ্চনা কৰি ৰাষ্ট্ৰপতিগৰাকীয়ে পোনে পোনে ৰাজভৱনলৈ যায় আৰু তাতে তেওঁ দুপৰীয়াৰ আহাৰ গ্ৰহণ কৰে ।ৰাষ্ট্ৰপতিগৰাকীৰ ৰাজভৱনতেই কিছু সময় জিৰণি লৈ তেওঁ বিয়লি শ্ৰীমন্ত শংকৰদেৱ কলাক্ষেত্ৰৰ এক অনুষ্ঠানত অংশগ্ৰহণ কৰে । 

উক্ত অনুষ্ঠানত মুখ্যমন্ত্ৰীয়ে ৰাষ্ট্ৰপতি কোবিন্দক এখন বৃন্দাৱনী বস্ত্ৰৰ আলোকচিত্ৰ প্ৰদান কৰে।ইয়াৰ পিছতে অসমৰ পঞ্চায়ত আৰু গ্ৰামোন্নয়ন মন্ত্ৰী ৰঞ্জিত দাসে নিজৰ মন্তব্য প্ৰকাশ কৰে।তেওঁ কয়,"বৃন্দাৱনী বস্ত্ৰৰ আলোকচিত্ৰ প্ৰদান কৰাত মই নথৈ আনন্দিত হৈছোঁ।ইয়াৰ দ্বাৰা বস্ত্ৰখন অসমলৈ ঘূৰাই অনাৰ পথ প্ৰশস্ত হ'ব।"বৃন্দাৱনী বস্ত্ৰ হৈছে শ্ৰীমন্ত শঙ্কৰদেৱৰ দিকদৰ্শনকলৈ প্ৰস্তুত কৰি উলিওৱা এখন বস্ত্ৰ যিখন বৰ্তমান লণ্ডনত আৰু কিছু অংশ পেৰিছত আছে।