ড০ হিমন্ত বিশ্ব শর্মা নেতৃত্বাধীন ৰাজ্য চৰকাৰৰ প্রথমখন পূর্ণাংগ বাজেটক কঠোৰ সমালোচনা কংগ্ৰেছ নেতৃত্বাধীনৰ

গুৱাহাটী,১৭ মাৰ্চ:ৰূপকোঁৱৰ জ্যোতিপ্রসাদ আগৰৱালাৰ কবিতা পাঠ কৰি ড০ হিমন্ত বিশ্ব শর্মা নেতৃত্বাধীন ৰাজ্য চৰকাৰৰ প্রথমখন পূর্ণাংগ বাজেট আজি বিত্ত মন্ত্রী অজন্তা নেওগে অসম বিধানসভাত দাখিল কৰে৷ ২০২২-২৩ বিত্তীয় বর্ষটোৰ অন্তত ৬০০.৩৬ কোটি টকাৰ ঘাটিৰে মন্ত্রী নেওগে দাখিল কৰে বাজেট৷ কেইবাখনো নতুন আঁচনিৰ লগতে পুৰণি জনকল্যাণকামী আঁচনিসমূহৰ ধাৰাবাহিকতা অক্ষুণ্ণ ৰাখি এই বাজেট দাখিল কৰা হৈছে৷

বুধবাৰে সদনত দাখিল কৰা ২০২২-২৩ বৰ্ষৰ বাজেট সন্দৰ্ভত প্ৰতিক্ৰিয়া প্ৰক‍াশ কৰি প্ৰদেশ কংগ্ৰেছৰ কাৰ্যকৰী সভাপতি বিধায়ক জাকিৰ হুছেইন শিকদাৰে কয় যে, "এইখন বাজেটে এটা বছৰৰ বিপৰীতে দীঘলীয়া সপোন দেখুৱাইছে । বাজেটৰ যোগেদি চৰকাৰে অসমবাসীক বহু সপোন আৰু আশা দিছে যদিও বাস্তৱত সেয়া পৰিণত কৰিব নোৱাৰে ।"

তেওঁ লগতে কয় যে, "ইয়াৰ পূৰ্বৰ বাজেটসমূহত দেখুওৱা সপোনবোৰ বাস্তৱত পৰিণত নহ'ল । পূৰ্বৰ দৰেই এইবাৰো সপোনৰ বাজেট দিছে । বাজেটত যিমানখিনি টকা খৰচ কৰিম বুলি কৈছে তাক কৰিমেই বুলি নিদিষ্ট কৰি কোৱা নাই । চৰকাৰে অসমৰ ৰাইজক দিম দিম বুলি কৈ আশাত ৰখাৰ স্বৰূপ এইখন বাজেট ।"