হিজাব নিষিদ্ধ কৰাৰ সিদ্ধান্তক প্ৰত্যাহ্বান জনোৱা আবেদন খাৰিজ,ইছলামৰ ৰীতি নীতি মতে হিজাব বাধ্যতামূলক নহয়

গুৱাহাটী,১৫ মাৰ্চ:কৰ্ণাটক উচ্চ ন্যায়ালয়ে আজি কৰ্ণাটকৰ শিক্ষানুষ্ঠানসমূহত হিজাবক লৈ হোৱা বিতৰ্কৰ সৈতে সম্পৰ্কিত এটা গোচৰত ৰায় প্ৰদান কৰিছে। উদুপী জিলাৰ কিছুমান শিক্ষাৰ্থীয়ে শ্ৰেণীকোঠা আৰু শিক্ষানুষ্ঠানত হিজাব পিন্ধাৰ আবেদন লৈ কৰ্ণাটক উচ্চ ন্যায়ালয়ৰ কাষ চাপিছিল। তেওঁলোকে শিক্ষানুষ্ঠানসমূহত হিজাব নিষিদ্ধ কৰাৰ সিদ্ধান্তক প্ৰত্যাহ্বান জনাইছিল। একেটা ক্ষেত্ৰতে কৰ্ণাটক উচ্চ ন্যায়ালয়ৰ মুখ্য ন্যায়াধীশ ৰিতু ৰাজ অৱস্থীয়ে আজি হিজাব নিষিদ্ধ কৰাৰ সিদ্ধান্তক প্ৰত্যাহ্বান জনোৱা এখন আবেদন খাৰিজ কৰে। 

আজি ৰায় প্ৰদান কৰি কৰ্ণাটক উচ্চ ন্যায়ালয়ৰ মুখ্য ন্যায়াধীশে কয়, "সমগ্ৰ ঘটনাটোৰ গুৰুত্ব অনুসৰি, আমি কেইটামান প্ৰশ্ন প্ৰস্তুত কৰিছিলো। সেই প্ৰশ্নবোৰৰ উত্তৰ দিয়া হৈছে। আমি জানিব বিচাৰিছিলো, ১.ইছলামত হিজাব বাধ্যতামূলক নেকি? ২.শিক্ষানুষ্ঠানসমূহত হিজাব নিষিদ্ধ কৰিলে মত প্ৰকাশৰ স্বাধীনতা আৰু গোপনীয়তাৰ অধিকাৰত হস্তক্ষেপ কৰে নেকি? ৩. চৰকাৰে ৫ ফেব্ৰুৱাৰীত কোনো চিন্তা নকৰাকৈ নিৰ্দেশনা জাৰী কৰিছিল নেকি? চৰকাৰে এই নিৰ্দেশনাবোৰ অনিয়ন্ত্ৰিত ভাৱে জাৰী কৰে নেকি? আমি এই প্ৰশ্নবোৰৰ উত্তৰ বিচাৰি পাইছিলো। ইছলামৰ মতে, হিজাব বাধ্যতামূলক নহয়। সেয়েহে, শিক্ষানুষ্ঠানসমূহত হিজাব নিষিদ্ধ কৰাৰ সিদ্ধান্তক প্ৰত্যাহ্বান জনোৱা আবেদনখন খাৰিজ কৰা হৈছে। '

যোৱা মাহত, কৰ্ণাটক উচ্চ ন্যায়ালয়ে শিক্ষানুষ্ঠানসমূহত হিজাব, গেৰুৱা স্কাৰ্ফকে ধৰি সকলো ধৰ্মীয় চিহ্ন অস্থায়ীভাৱে নিষিদ্ধ কৰিছিল। কৰ্ণাটক উচ্চ ন্যায়ালয়ে আজি গোচৰটোৰ ৰায় দিছিল।