প্রিয় দল কেৰালা ব্লাষ্টাৰ্ছক সমৰ্থন কৰিবলৈ গৈ দুর্ঘটনাত পতিত হৈ মৃত্যু দুই ফুটবল অনুৰাগীৰ

গুৱাহাটী,২১ মাৰ্চ:প্রায় দুবছৰ পিছত ষ্টেডিয়ামত বহি ফুটবল মেচ চোৱাৰ সুযোগ আহিছে এইবাৰ। তাকো আকৌ আইএছএল ফাইনেল। খেলিব প্রিয় দল কেৰালা ব্লাষ্টাৰ্ছ। দেওবাৰে আইএছএলৰ ফাইনেল চাবলৈ গৈছিল দুই যুৱক। কিন্তু ষ্টেডিয়াম পোৱাৰ পূৰ্বেই ঘটে মাৰাত্মক দুর্ঘটনা। ফতোর্দা ষ্টেডিয়ামত পিছে খেল চোৱা নহ’ল কেৰালা ব্লাষ্টাৰ্ছৰ দুই সমর্থকৰ।

আইএছএলৰ ফাইনেল চাবলৈ গোৱালৈ গৈছিল দুই ফুটবল অনুৰাগী। কিন্তু মাজপথতে বাইক দুর্ঘটনাত প্রাণ হেৰুৱালে জামশিৰ আৰু মহম্মদ চিবিলে। কেৰালা ব্লাষ্টাৰ্ছৰ সমর্থকসকলৰ ক্লাব মঞ্জপ্পাডাৰ টুইটাৰ একাউণ্টৰ পৰা এই কথা জনোৱা হৈছে। কেৰালাৰ এটি স্থানীয় সংবাদ সংস্থাৰ পৰা পোৱা খবৰ অনুযায়ী দেওবাৰে পুৱা পাঁচ বজাত দুর্ঘটনাটো সংঘটিত হয়। 

উড়ুমা পাল্লাথ নামৰ এটি স্থানত ট্ৰাকৰ সৈতে খুন্দা লাগে তেওঁলোকৰ বাইকৰ। দুর্ঘটনাস্থলীতেই প্রাণ হেৰুৱায় দুয়োজনে। জানিব পৰা মতে বৰষুণৰ ফলত ৰাস্তা পিছল হৈ আছিল।