ইজৰাইলৰ প্ৰধানমন্ত্ৰীয়ে এপ্ৰিলত কৰিব ভাৰত ভ্ৰমণ,বিজ্ঞান-প্ৰযুক্তি আদি বিভিন্ন ক্ষেত্ৰত আলোচনাৰ সম্ভাৱনা

গুৱাহাটী,২৪ মাৰ্চ:ইজৰাইলৰ প্ৰধানমন্ত্ৰী নাফটালি বেনেটে অহা ৩ এপ্ৰিলত ভাৰত ভ্ৰমণৰ কাৰ্যসূচী হাতত লৈছে। যোৱা বছৰ ইজৰাইলৰ প্ৰধানমন্ত্ৰীৰ কাৰ্যভাৰ গ্ৰহণ কৰাৰ পিছত তেওঁৰ এইটো প্ৰথম ভ্ৰমণ।

ভাৰত আৰু ইজৰাইলৰ মাজত ৩০ বছৰীয়া কূটনৈতিক সম্পৰ্কৰ স্মৰণীয় অনুষ্ঠানত নাফটালীয়ে এই ভ্ৰমণৰ কাৰ্যসূচী হাতত লৈছে।বৈদেশিক পৰিক্ৰমা মন্ত্ৰালয়ে এক চৰকাৰী বিবৃতিত কয়, "প্ৰধানমন্ত্ৰী নৰেন্দ্ৰ মোদীৰ আমন্ত্ৰণত বেনেটে ৩-৫ এপ্ৰিললৈ ভাৰত ভ্ৰমণ কৰিব। দুয়োগৰাকী নেতাই ইয়াৰপূৰ্বে যোৱা বছৰ নৱেম্বৰত গ্লাছগোত ৰাষ্ট্ৰসংঘৰ জলবায়ু পৰিৱৰ্তন সন্মিলনৰ (চি অ পি ২৬) সময়ত মিলিত হৈছিল।"

তেওঁলোকে ২০২১ চনৰ ১৬ আগষ্টত টেলিফোনিক বাৰ্তালাপ কৰিছিল। মন্ত্ৰণালয়ে এক বিবৃতিত কয়, "বেনেটৰ এই ভ্ৰমণ প্ৰধানমন্ত্ৰী হিচাপে তেওঁ ক্ষমতালৈ অহাৰ পিছত প্ৰথম ভ্ৰমণ হ'ব।"২০১৭ চনৰ জুলাইত প্ৰধানমন্ত্ৰী মোদীৰ ইজৰাইল ভ্ৰমণৰ সময়ত ভাৰত আৰু ইজৰাইলে তেওঁলোকৰ দ্বিপাক্ষিক সম্পৰ্কক যথেষ্ট উন্নীত কৰিছিল। তেতিয়াৰ পৰাই দুয়োখন দেশে উদ্ভাৱন আৰু গৱেষণাৰ ওপৰত গুৰুত্ব দি তেওঁলোকৰ কৌশলগত অংশীদাৰীত্ব আৰু গভীৰ কৰি আহিছে।বিবৃতিত লগতে কোৱা হৈছে যে, "ইজৰাইলৰ প্ৰধানমন্ত্ৰীৰ এই ভ্ৰমণে কৃষি, পানী, বাণিজ্য, শিক্ষা আৰু বিজ্ঞান আৰু প্ৰযুক্তিকে ধৰি বিভিন্ন ক্ষেত্ৰত আমাৰ উৎকৃষ্ট দ্বিপাক্ষিক সহযোগিতা অধিক শক্তিশালী কৰিব বুলি আশা কৰা হৈছে।"