ক'ভিডৰ ভেকছিন দিয়াৰ নামত চিকিৎসকে কৰিলে সকলোকে ক্ষোভিত কৰা কাণ্ড

গুৱাহাটী, ২৯ মাৰ্চঃ ক'ৰনা মহামাৰীয়ে আকৌ এবাৰ মূৰ দাঙি উঠাত অতিষ্ঠ হৈ বিশ্বই ক'ভিড ছিটাকৰণৰ ৰূপত আৰোগ্য হোৱাৰ এক গুৰুত্বপূৰ্ণ উপায় বিচাৰি আছে। ইফালে, কিছুমান লোকে ছিটাকৰণক ভুল বুলি ন্যায়সঙ্গত কৰিবলৈ চেষ্টা কৰি আছে। কিন্তু ইয়াৰ মাজতে ছিংগাপুৰৰ এজন চিকিৎসকে এই বিষয়ত সকলো সীমা অতিক্ৰম কৰিছে। 

তেওঁ ৰোগীসকলক ক'ভিড ভেকছিন প্ৰদান নকৰাকৈয়ে ছিংগাপুৰৰ স্বাস্থ্য মন্ত্ৰালয়ত মিছা ছিটাকৰণৰ তথ্য আপলোড কৰি আহিছে। এইটো জানিব পৰা গৈছে যে এই চিকিৎসকজন ছিটাকৰণৰ বিৰোধিতা কৰা এটা গোটৰ সৈতে জড়িত হৈ আছে।

ডাঃ জিপচন কোৱাহ নামৰ এই ৩৩ বছৰীয়া চিকিৎসকজনে ক'ভিড ভেকছিনৰ সলনি লোকসকলক সাধাৰণ চেলাইনৰ দ্ৰৱণৰ বেজী দি আহিছে। ইয়াৰ ফলত বহুতো ৰোগী ক'ভিড ভেকছিন গ্ৰহণ কৰাৰ পৰা বঞ্চিত হ'বলগীয়া হৈছে আৰু নিশ্চিতভাৱে এই পৰিস্থিতি তেওঁলোকৰ বাবে মাৰাত্মক হিচাপে প্ৰমাণিত হ'ব পাৰে।

কেৱল এয়াই নহয়, তেওঁ স্বাস্থ্য মন্ত্ৰালয়ত ছিটাকৰণৰ বিষয়ে ভুল তথ্যও আপলোড কৰিছে। বাতৰি অনুসৰি, বিষয়টো পোহৰলৈ অহাৰ পিছত, ছিংগাপুৰ চিকিৎসা পৰিষদে তেওঁক ১৮ মাহৰ বাবে নিলম্বিত কৰিছে। পৰিষদে কৈছে যে, "জনসাধাৰণৰ সুৰক্ষা আৰু ৰাজহুৱা স্বাৰ্থৰ বাবে চিকিৎসকৰ এনে কাণ্ডৰ ফলস্বৰূপে ডাঃ কোৱাহৰ পঞ্জীয়ন স্থগিত ৰখাটো প্ৰয়োজনীয়।"

পৰিষদে লগতে কৈছে যে, "ডাঃ কোৱাহে ৰোগীসকলৰ পৰা যথেষ্ট ধন লৈছে আৰু বেজীত চেলাইন দ্ৰৱণ পূৰণ কৰি ইয়াক ক'ভিড ভেকছিনৰ নামত প্ৰদান কৰি আহিছে। ইয়াৰ উপৰিও, তেওঁ আমাৰ স্বাস্থ্য বিভাগৰ পৰ্টেলত এজন ছিটাকৰণ নকৰা ৰোগীৰ ভুৱা ক'ভিড-১৯ এণ্টিজেন ৰেপিড পৰীক্ষা (এ.আৰ.টি.) প্ৰতিবেদন আপলোড কৰে, যাৰ ফলত তেওঁ ছিটাকৰণৰ বাবে থকা সুৰক্ষা ব্যৱস্থা লাভ কৰিব নোৱাৰিলে।"

বৰ্তমান, পৰিষদে বিষয়টো চোৱাচিতা কৰিবলৈ এখন স্বতন্ত্ৰ অভিযোগ সমিতি নিয়োগ কৰিছে। ড০ কোৱাহৰ উপৰিও, তেওঁৰ সহকাৰী থমাছ চুয়া চেং চুনৰ বিৰুদ্ধেও প্ৰৱঞ্চনাৰ ষড়যন্ত্ৰৰ অভিযোগ উত্থাপিত হৈছে।