পৰিস্থিতি নিয়ন্ত্ৰণৰ বাবে ভাৰতে প্ৰেৰণ কৰা নাই সেনা, উৰা বাতৰিক প্ৰত্যাখ্যান বৈদেশিক মন্ত্ৰণালয়ৰ

গুৱাহাটী,৩ এপ্ৰিল:সম্প্ৰতি অস্থিৰতাই বিৰাজ কৰিছে দ্বীপৰাষ্ট্ৰ শ্ৰীলংকাত । প্ৰথমে অৰ্থনৈতিক সংকট আৰু এতিয়া জৰুৰী অৱস্থা । অশান্তজৰ্জৰ শ্ৰীলংকাত এইবাৰ উৰা বাতৰিকলৈ সৃষ্টি হৈছে তীব্ৰ চাঞ্চল্যৰ । ভাৰতীয় সেনাৰ প্ৰৱেশৰ উৰা বাতৰিয়ে বৰ্তমান দেশখনত আন এক প্ৰতিক্ৰিয়াৰ সৃষ্টি কৰিছে ।আন এক প্ৰতিক্ৰিয়াৰ সৃষ্টি কৰিছে ।

উল্লেখ্য যে, পৰ্যটনৰ ওপৰত নিৰ্ভৰশীল শ্ৰীলংকাত শেহতীয়াকৈ অৰ্থনৈতিক সংকটে দেখা দিছে । অৰ্থনৈতিক সংকটৰ বাবে ৰাষ্ট্ৰপতিৰ লগতে চৰকাৰক দোষাৰোপ কৰিছে সাধাৰণ ৰাইজে । যাৰ বাবে দেশজুৰি তীব্ৰ আন্দোলন দেখিবলৈ পোৱা গৈছে । বহু স্থানত হিংসাত্মক প্ৰতিবাদৰ সৃষ্টি হৈছে ।ফলস্বৰূপে শ্ৰীলংকাৰ ৰাষ্ট্ৰপতি গোটাবায়া ৰাজাপাক্ষেয়ে শনিবাৰে দেশখনত জৰুৰীকালীন অৱস্থাৰ ঘোষণা কৰে । এনে পৰিৱেশৰ মাজতে শ্ৰীলংকাত ভাৰতীয় সেনাৰ প্ৰৱেশৰ কথা পোহৰলৈ আহিছে ৷ পৰিস্থিতি নিয়ন্ত্ৰণৰ বাবে ভাৰতে সেনা প্ৰেৰণ কৰাৰ খবৰ বিয়পি পৰাৰ পাছতে দেশখনত তীব্ৰ আশংকাই দেখা দিছে ।

অৱশ্যে এই বাতৰি ভুৱা আখ্যা দিছে শ্ৰীলংকাৰ সামৰিক বাহিনী আৰু ভাৰতীয় উচ্চ আয়োগে। প্ৰতিৰক্ষা সচিব কমল গুণাৰতনে শনিবাৰে সামাজিক মাধ্যমত প্ৰচাৰিত ভাৰতীয় সৈন্যৰ আগমনৰ বাতৰি অস্বীকাৰ কৰে ৷ লগতে কয় যে ২০২১ চনৰ ভাৰত-শ্ৰীলংকাৰ যুটীয়া সামৰিক অনুশীলনৰ এক চৰকাৰী আলোকচিত্ৰ ভুৱা বাতৰিটোত প্ৰকাশ পাইছে ।সচিবগৰাকীয়ে কয় যে, ২০২১ চনৰ শ্ৰীলংকা-ভাৰত যুটীয়া সামৰিক অনুশীলন 'মিত্ৰ শক্তি'ৰ সময়ত তোলা ভাৰতীয় সৈন্যৰ আলোকচিত্ৰসমূহ ভুৱা বাতৰিৰ জৰিয়তে প্ৰকাশ কৰা হৈছে । তেওঁ নিশ্চিত যে শ্ৰীলংকাৰ ত্ৰি-বাহিনীয়ে ৰাষ্ট্ৰীয় নিৰাপত্তা নিশ্চিত কৰিবলৈ যিকোনো পৰিস্থিতিৰ সন্মুখীন হ'বলৈ সক্ষম । এনে ভুল তথ্যৰ দ্বাৰা মানুহক বিপথে পৰিচালিত নহ'বলৈও তেওঁ আহ্বান জনায় ।ভাৰতীয় উচ্চ আয়োগে এই বাতৰি মিছা আৰু ভিত্তিহীন বুলি দাবী কৰে । একাংশ সংবাদ মাধ্যমে দেশখনত ভুৱা বাতৰি প্ৰকাশ কৰাৰো অভিযোগ কৰে উচ্চ আয়োগে ।