ভুৱা তথ্য প্ৰচাৰৰ বাবে বন্ধ কৰা হ'ল ২২ টা ইউটিউব চেনেল

গুৱাহাটী, ৫ এপ্ৰিলঃ মঙলবাৰে কেন্দ্ৰীয় চৰকাৰে ৰাষ্ট্ৰীয় সুৰক্ষা, বৈদেশিক সম্পৰ্ক আৰু ৰাজহুৱা শৃংখলা সম্পৰ্কে ভুৱা তথ্য প্ৰচাৰ কৰাৰ বাবে ২২ টা ইউটিউব চেনেল বন্ধ কৰে।

তথ্য আৰু সম্প্ৰচাৰ মন্ত্ৰালয়ৰ তথ্য প্ৰযুক্তি নিয়ম, ২০২১ৰ অধীনত ইউটিউব চেনেলকেইটা বন্ধ কৰা হৈছে। প্ৰথমতে, অৱৰোধ কৰা ২২ টা চেনেলৰ ভিতৰত ১৮ টা ভাৰতীয় মূলৰ, আনহাতে ৪ টা পাকিস্তানৰ ইউটিউব নিউজ চেনেল।

এই সন্দৰ্ভত চৰকাৰে এক বিবৃতিত কয় যে, "ভাৰতীয় সশস্ত্ৰ বাহিনী, জম্মু-কাশ্মীৰ আদি বিভিন্ন বিষয়ত ভুৱা বাতৰি পোষ্ট কৰিবলৈ একাধিক ইউটিউব চেনেল ব্যৱহাৰ কৰা হৈছে। বন্ধ কৰিবলৈ নিৰ্দেশ দিয়া সময়ত পাকিস্তানৰ পৰা সমন্বিত ভাৱে পৰিচালিত একাধিক ছ'চিয়েল মিডিয়া একাউণ্টৰ পৰা পোষ্ট কৰা কিছুমান ভাৰত বিৰোধী সমলও অন্তৰ্ভুক্ত আছে।"

"লগতে, দেখা গৈছে যে, ইউক্ৰেইনত চলি থকা পৰিস্থিতিৰ সৈতে সম্পৰ্কিত এই ভাৰতীয় ইউটিউব আধাৰিত চেনেলসমূহে প্ৰকাশ কৰা এক অধিকেই ভুৱা সমল, আৰু ইয়াৰ উদ্দেশ্য হৈছে আন দেশৰ সৈতে ভাৰতৰ বৈদেশিক সম্পৰ্ক বিনষ্ট কৰা।" 

ইয়াৰ পূৰ্বে জানুৱাৰী মাহত প্ৰায় ৩৫ টা ইউটিউব চেনেল, দুটা টুইটাৰ একাউণ্ট, দুটা ইনষ্টাগ্ৰাম একাউণ্ট, দুটা ৱেবছাইট আৰু এটা ফেচবুক একাউণ্ট তথ্য আৰু সম্প্ৰচাৰ মন্ত্ৰালয়ে ভুৱা তথ্য প্ৰচাৰ কৰাৰ অভিযোগত বন্ধ কৰিছে। 

তথ্য আৰু সম্প্ৰচাৰ মন্ত্ৰালয়ৰ যুটীয়া সচিব (পি এণ্ড এ) বিক্ৰম সহায়ে কৈছে যে, "এই সকলো একাউণ্টৰ মাজত সাধাৰণ কাৰকসমূহ হৈছে, এইবোৰে পাকিস্তানৰ অধীনত কাম কৰে আৰু ভুৱা ভাৰত বিৰোধী বাতৰি আৰু অন্যান্য সমল বিয়পাই ফুৰে।"

মন্ত্ৰালয়ে লগতে কয়, "বন্ধ কৰা একাউণ্টবোৰত ভাৰতীয় সেনা বাহিনী, কাশ্মীৰ, আন দেশৰ সৈতে ভাৰতৰ বৈদেশিক সম্পৰ্ক আৰু প্ৰাক্তন চিডিএছ বিপিন ৰাৱাটৰ মৃত্যুৰ বিষয়বস্তু জড়িত হৈ আছে।"