ৰাষ্ট্রসংঘক ভংগ কৰি দিয়াৰ আহ্বান জনালে ইউক্রেইনৰ ৰাষ্ট্ৰপতি ভলোদিমিৰ জেলেনস্কিয়ে

গুৱাহাটী,৬ এপ্ৰিল:ৰাষ্ট্রসংঘৰ মঞ্চত ক্ষোভৰ উদ্গীৰণ ঘটালে ইউক্রেইনৰ ৰাষ্ট্ৰপতি ভলোদিমিৰ জেলেনস্কিয়ে। কঠোৰ ভাষাত তেওঁ কয়, ‘হয় এতিয়াই কোনো পদক্ষেপ গ্রহণ কৰক, নহ’লে ৰাষ্ট্রসংঘই ভংগ কৰি দিয়ক।’ৰাষ্ট্রসংঘৰ মঞ্চত কথা কোৱাৰ সুযোগ পায়েই ৰুছ বাহিনীৰ আক্ৰমণত দেশৰ দুর্দশা আৰু ভয়ঙ্কৰ পৰিস্থিতিৰ কথা দাঙি ধৰে ইউক্রেইনৰ ৰাষ্ট্ৰপতিয়ে। কিয়েভসহ একাধিক শচহৰত যেনেদৰে ৰাস্তাত হাত–ভৰি বন্ধা মৃতদেহ দেখা গৈছে, সেই ভিডিওৰ কথা দাঙি ধৰি তেওঁ কয়, ‘ঘৰ বা এপার্টমেন্টত সোমাই হত্যা কৰা হৈছে, গ্রেনেডেৰে উৰুৱাই দিয়া হৈছে।

সাধাৰণ নাগৰিক ৰাস্তাত গাড়ীৰে গৈ থকা অৱস্থাত তেওঁলোকক টেঙ্কাৰেৰে চেপা হৈছে কেৱল নিজৰ আনন্দৰ বাবে। হাত–ভৰি কটা হৈছে, ডিঙি কাটি দিয়া হৈছে। মহিলাসকলক সন্তানৰ সন্মুখতেই ধর্ষণ কৰা হৈছে। আৰু এইটো কৰিছে ৰাষ্ট্রসংঘৰ নিৰাপত্তা পৰিষদৰ এক সদস্যয়েই কৰিছে।’ৰাষ্ট্রসংঘৰ ১৫ সদস্যৰ পৰিষদৰ ওচৰত জেলেনস্কিয়ে কয়, ইউক্রেইনৰ চহৰবোৰত ৰাছিয়াই যেনেদৰে হিংসাৰ বহিঃপ্রকাশ ঘটাইছে সেয়া ইছলামিক ষ্টেটছ গ্রুপৰ সন্ত্রাসবাদী আচৰণতকৈর কম নহয়। ইউক্রেইনত হত্যালীলা চলোৱাৰ বাবে ৰাছিয়াক যাতে নিৰাপত্তা পৰিষদৰ পৰা বহিষ্কাৰ কৰা হয়, সেই দাবীও তোলে জেলেনস্কিয়ে।