মেঘালয়ৰ ৰি-ভই জিলাত সংঘটিত পথ দুৰ্ঘটনাত নিহত তামিলনাডুৰ ৰাষ্ট্ৰীয় পৰ্যায়ৰ যুৱ টেবুল টেনিছ খেলুৱৈ

গুৱাহাটী,১৮ এপ্ৰিল:মেঘালয়ৰ ৰি-ভই জিলাত সংঘটিত হৈছে এক পথ দুৰ্ঘটনা ৷ দেওবাৰে সংঘটিত হোৱা এই দুৰ্ঘটনাটোত তামিলনাডুৰ ৰাষ্ট্ৰীয় পৰ্যায়ৰ যুৱ টেবুল টেনিছ খেলুৱৈ দীনদয়ালন বিশ্বই প্ৰাণ হেৰুৱায় ৷ তদুপৰি আন তিনিগৰাকী খেলুৱৈ গুৰুতৰভাৱে আহত হয় ৷

আৰক্ষী সূত্ৰই সদৰি কৰা অনুসৰি, খেলুৱৈসকলে যাত্ৰা কৰা বাহনখনে ১২ চকীয়া এখন ট্ৰাকত খুন্দা মৰাৰ ফলতে এই দুৰ্ঘটনাটো সংঘটিত হয় ৷ তামিলনাডুৰ খেলুৱৈসকলে ৮৩ তম ছিনিয়ৰ নেশ্যনেল টেবুল টেনিছ চেম্পিয়নশ্বিপত অংশগ্ৰহণ কৰাৰ উদ্দেশ্যে শ্বিলঙলৈ গৈ আছিল ৷জানিব পৰা মতে, গুৱাহাটীৰ লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰৰ পৰা খেলুৱৈৰ দলটোৱে এখন পৰ্যটক কঢ়িওৱা টেক্সী ভাড়াত লৈ শ্বিলং অভিমুখে গৈ আছিল ৷ তেনে সময়তে মেঘালয়ৰ চাং বাংলা এলেকাত দেওবাৰে দিনৰ প্ৰায় ১.৩০ বজাত বিপৰীত দিশৰ পৰা আহি থকা এখন ট্ৰাকৰ সৈতে টেক্সীখনৰ মুখামুখি সংঘৰ্ষ ঘটে বুলি আৰক্ষীয়ে প্ৰকাশ কৰে ৷

মেঘালয় টেবুল টেনিছ এছ'চিয়েছনে এক বিবৃতিত কয় যে, দুৰ্ঘটনাটো সংঘটিত হোৱাৰ পিছত খেলুৱৈসকলক ৰি-ভইৰ নংপো অসামৰিক চিকিৎসালয়লৈ নিয়াৰ পথতে ১৮ বছৰীয়া বিশ্বৰ মৃত্যু ঘটে ৷ সম্প্ৰতি আন খেলুৱৈসকল উত্তৰ-পূৱ ইন্দিৰা গান্ধী আঞ্চলিক স্বাস্থ্য আৰু চিকিৎসা বিজ্ঞান প্ৰতিষ্ঠানত চিকিৎসাধীন হৈ আছে ৷তদুপৰি আন খেলুৱৈসকল সংকটমুক্ত বুলি ঘোষণা কৰিছে চিকিৎসকে ৷ মেঘালয় টেবুল টেনিছ এছ'চিয়েছনৰ উপ-সভাপতি ব্ৰুছ পি মাৰাক আৰু সাধাৰণ সম্পাদক চিৰঞ্জীৱ চৌধুৰীয়ে অত্যন্ত প্ৰতিভাশালী আৰু প্ৰতিশ্ৰুতিসম্পন্ন যুৱ খেলুৱৈগৰাকীৰ মৃত্যুত শোক প্ৰকাশ কৰে।