'ৰাইজৰ দল’ৰ পৰা আঁতৰি আহিল কমল কুমাৰ মেধি,বিজেপিৰ এজেণ্ট আখ্যা দলীয় নেতৃত্বৰ

গুৱাহাটী,২০ এপ্ৰিল:'ৰাইজৰ দল’ৰ পৰা আঁতৰি আহিল কমল কুমাৰ মেধি। যোৱা ১২ এপ্ৰিলতে তেওঁ পদত্যাগ পত্ৰ প্ৰেৰণ কৰিছিল সভাপতিলৈ।

সেইকথা ৰাজহুৱা কৰি তেওঁ কয়, 'ৰাইজৰ দল’ৰ পৰা যোৱা ১২ এপ্ৰিলতে পদত্যাগ কৰিছিলোঁ ৷কিন্তু এই কথাটো মই সংবাদ মাধ্যম বা সামাজিক মাধ্যমত প্ৰচাৰ কৰা নাছিলোঁ ৷তাৰ কাৰণটো আছিল- মোৰ পদত্যাগৰ বিষয়টো দলৰ বাবে এটা নেতিবাচক ইছ্যুত পৰিণত নহওক ৷ মই মনে মনে আঁতৰি দিম, দিন যোৱাৰ পিছত মানুহে গম পালেও দলৰ একো ক্ষতি নহয় তেতিয়া৷ মোৰ মনৰ ভিতৰত থকা অভিযোগবোৰো আৰু ৰাজহুৱা নকৰোঁ, যদিও ক’বলৈ বহু কথাই আছে ৷ মই সম্পূৰ্ণ ইতিবাচক দৃষ্টিভংগীৰে আগবাঢ়িছিলোঁ ৷কালি আৰু আজি দলৰ কেন্দ্ৰীয় কৰ্ণধাৰ আৰু বিষয়ববীয়াৰ সভা আছিল৷মই যিহেতু পদত্যাগ কৰিছিলোঁ, গতিকে মই মিটিঙলৈ যোৱাৰ প্ৰশ্নই নুঠে৷ কিন্তু কালিৰ কৰ্ণধাৰ সমিতিৰ সভাই মোৰ পদত্যাগ পত্ৰ গ্ৰহণ নকৰাৰ সিদ্ধান্ত লয় আৰু সভাৰ শেষত সভাপতি অখিল গগৈ ডাঙৰীয়াৰ নেতৃত্বত কৰ্ণধাৰ সমিতিখন আমাৰ ঘৰলৈ আহে৷

তেওঁলোকে মোৰ পদত্যাগ পত্ৰখন গ্ৰহণ নকৰাৰ প্ৰস্তাৱটো সন্দৰ্ভত মোক জনায় আৰু পিছদিনাৰ অৰ্থাৎ আজিৰ বিষয়ববীয়াৰ সভাত উপস্থিত থাকিবলৈ কয়৷ দলৰ সভাপতিকে ধৰি কৰ্ণধাৰ সমিতিৰ মাননীয় সদস্যসকলৰ এই আহ্বানৰ প্ৰতি সন্মান জনাই মই আজিৰ বিষয়ববীয়াৰ সভাত সৌজন্যতাৰ খাটিৰত উপস্থিত হওঁ৷ লগতে মই এই কথাও স্পষ্ট কৰি দিওঁ যে সভাপতিকে ধৰি কৰ্ণধাৰৰ সদস্যসকলৰ আহ্বানৰ প্ৰতি সন্মান জনাই মই আজিৰ সভাত উপস্থিত হৈছোঁ যদিও মই পদত্যাগ পত্ৰখন প্ৰত্যাহাৰ নকৰোঁ ।মই ভাবি আছিলোঁ যে সভাত বিশেষ বক্তব্য নিদিয়াকৈ কিছু সময় বহি সভাপতিক মাত লগাই মই উঠি আহিম। কিন্তু সেই সময়তে এটা বিষয়ক লৈ একপ্ৰকাৰ বিতৰ্ক আৰম্ভ হৈছিল৷ এগৰাকী নেতাই বিষয়টো সন্দৰ্ভত অলপ বেলেগকৈ ব্যাখ্যা আগবঢ়াই থকাত মই আচল কথাটো সভাত উল্লেখ কৰি দিলোঁ৷ লগে লগে বিষয়টোক লৈ যুক্তি-তৰ্ক আৰম্ভ হ’ল৷ একেলগে কেইবাজনেও ঠিয় হৈ ক’বলৈ ধৰিলে ৷ 

তাৰপিছত সেই নেতাই এইবাৰ মোক উদ্দেশ্যি ক’বলৈ ধৰিলে যে মই হেনো বিজেপিৰ এজেণ্ট হৈ সভাত গণ্ডগোল লগাই দিছোঁ ৷ মই বোলো কোনো কাৰণ নোহোৱাকৈ মই যদি বিজেপিৰ এজেণ্ট হ’ব পাৰোঁ- তেন্তে আপুনি এআইইউডিএফ বা অলকায়দাৰ এজেণ্ট ৷...দলৰ পৰা পদত্যাগ কৰিও দলৰ ক্ষতি নহওক বুলি মই কৰি অহা আচৰণ বুজি নোপোৱা সকলক মই ছাগৈ অপাত্ৰত দান দিয়াৰ দৰে হৈছে ৷ গতিকে এইকেইদিন গোপনে ৰখা খবৰটো পৰিস্থিতিয়ে ফাদিল কৰিবলৈ বাধ্য কৰালে ৷ 'ৰাইজৰ দল’ৰ নিষ্ঠাবান কৰ্মীসকললৈ ক্ষমা প্ৰাৰ্থনা !(লগতে এইটোও জনাই থওঁ যে বেলেগ কোনো দললৈ যোৱাৰ কোনো পৰিকল্পনা মোৰ নাই ৷)’