চৰকাৰে দেশৰ ৰাষ্ট্ৰীয় সুৰক্ষাৰ স্বাৰ্থত ব্লক কৰিলে এটা ফেচবুক একাউণ্ট আৰু ১৬ টা ইউটিউব চেনেল

গুৱাহাটী,২৬ এপ্ৰিল:চৰকাৰে দেশৰ ৰাষ্ট্ৰীয় সুৰক্ষা, বৈদেশিক সম্পৰ্ক আৰু ৰাজহুৱা শৃংখলা সম্পৰ্কীয় বিভ্ৰান্তিকৰ তথ্য প্ৰচাৰ কৰাৰ বাবে এটা ফেচবুক একাউণ্ট আৰু ১৬ টা ইউটিউব চেনেল নিষিদ্ধ কৰিছে। ইয়াৰে ছয়টা চেনেল পাকিস্তানৰ পৰা চলি আছিল। তথ্য আৰু সম্প্ৰচাৰ মন্ত্ৰালয়ে এক বিবৃতিত কয় যে ব্লক কৰা ইউটিউব চেনেল আৰু ফেচবুক একাউণ্টৰ মুঠ দৰ্শকৰ সংখ্যা ৬৮০ মিলিয়নতকৈও অধিক আছিল আৰু এই চেনেল আৰু একাউণ্টসমূহে ভাৰতত ৰাজহুৱা শৃংখলা বিঘ্নিত কৰা আৰু সাম্প্ৰদায়িক সম্প্ৰীতিৰ পৰিৱেশক বিনষ্ট কৰাৰ লগতে অপ্ৰমাণিত তথ্য বিয়পাই আছিল। 

এই ডিজিটেল সংবাদ প্ৰকাশকসকলৰ কোনোৱেই তথ্য প্ৰযুক্তি নিয়ম, ২০২১ৰ অধীনত মন্ত্ৰালয়ক প্ৰয়োজনীয় তথ্য প্ৰদান কৰা নাছিল। ইয়াৰ আগতে, চৰকাৰে নিয়ম উলংঘা কৰাৰ বাবে ২২টা ইউটিউব চেনেল ব্লক কৰিছিল। ৫ এপ্ৰিলত, নতুন তথ্য প্ৰযুক্তি নিয়মৰ অধীনত, চৰকাৰে ২২ টা ইউটিউব চেনেল ব্লক কৰে। চাৰিটা পাকিস্তানী চেনেলো ইয়াত অন্তৰ্ভুক্ত কৰিছিল। প্ৰতিবেদন অনুসৰি, ৰাষ্ট্ৰীয় সুৰক্ষা, বৈদেশিক সম্পৰ্ক আৰু ৰাজহুৱা শৃংখলা সম্পৰ্কীয় মিছা বাতৰি সম্প্ৰচাৰ কৰাৰ বাবে এই চেনেলসমূহ নিষিদ্ধ কৰা হৈছে।