শিৱসাগৰৰ ৰংঘৰ বাকৰিত আটক ধুনীয়াকৈ অনুষ্ঠিত কৰা হ'ব আগন্তুক আন্তঃৰাষ্ট্ৰীয় যোগ দিৱস

গুৱাহাটী,২ মে':আয়ুষ মন্ত্ৰণালয়ে অসম চৰকাৰৰ সহযোগত সোমবাৰে শিৱসাগৰৰ ৰংঘৰ খেলপথাৰত আগন্তুক আন্তঃৰাষ্ট্ৰীয় যোগ দিৱস উপলক্ষে এক বিশাল অনুষ্ঠানৰ আয়োজন কৰিব বুলি ঘোষণা কৰিছে। উক্ত অনুষ্ঠানত কেন্দ্ৰীয় কেবিনেট মন্ত্ৰী সৰ্বানন্দ সোণোৱালৰ লগতে উপস্থিত থাকিব মুখ্যমন্ত্ৰী হিমন্ত বিশ্ব শৰ্মা।

তেওঁলোকৰ লগতে কেন্দ্ৰীয় পৰ্যটন, সংস্কৃতি আৰু ডনাৰ মন্ত্ৰী জি কিষাণ ৰেড্ডী, আয়ুষ আৰু ডব্লিউচিডিৰ ৰাজ্যিক মন্ত্ৰী ডঃ মুঞ্জপাৰা মহেন্দ্ৰভাই আৰু অসমৰ স্বাস্থ্য মন্ত্ৰী কেশৱ মহন্তও উপস্থিত থাকিব। এই অনুষ্ঠানত আয়ুষ মন্ত্ৰালয় আৰু অসম চৰকাৰৰ বিষয়া বিশিষ্ট যোগ গুৰু, যোগ বিশেষজ্ঞসকলেও অংশগ্ৰহণ কৰিব।

যোগ উৎসৱৰ বাবে শিৱসাগৰক নিৰ্বাচিত কৰাৰ মূল কাৰণ হৈছে ভাৰত চৰকাৰৰে দেশৰ পাঁচটা পুৰাতাত্ত্বিক স্থানক বিশ্বমানৰ আন্তঃ গাঠনিৰে বিকশিত কৰাৰ পৰিকল্পনা কৰিছে। সেইসমূহ হৈছে ৰাখীগুৰি (হাৰিয়ানা), হস্তিনাপুৰ (উত্তৰ প্ৰদেশ), শিৱসাগৰ (অসম), ধোলাভিৰা (গুজৰাট) আৰু আদিচনাললুৰ (তামিলনাডু)। স্মৰ্তব্য যে আন্ত:ৰাষ্ট্ৰীয় যোগ দিৱস প্ৰত্যেক বছৰে ২১ জুন তাৰিখে বিশ্বজুৰি অনুষ্ঠিত কৰা হয় ।