এইবাৰ দিল্লীস্থিত এইমছৰ নাম সলনি কৰিব বিচাৰিছে কেন্দ্ৰীয় চৰকাৰেঃ সৰ্বত্ৰে বিৰূপ প্ৰতিক্ৰিয়া

গুৱাহাটী,১৮ ছেপ্টেম্বৰ:দিল্লীৰ All India Institute of Medical Science (AIIMS)ৰ নাম সলনি কৰিব বিচাৰিছে কেন্দ্ৰীয় চৰকাৰে। এই সন্দৰ্ভত এক খচৰা প্ৰস্তাৱ লাভ কৰাৰ পিছতে দিল্লী এইমছ কৰ্তৃপক্ষই কেন্দ্ৰীয় স্বাস্থ্যমন্ত্ৰী মনসুখ মাণ্ডব্যলৈ এক পত্ৰ প্ৰেৰণ কৰে।

নাম সলনি কৰিলে হয়তো এই প্ৰাচীন প্ৰতিষ্ঠানটোৱে স্বীকৃতি হেৰুৱাব পাৰে বুলি তেওঁলোকৰ দাবী।সংবাদ মাধ্যমৰ খবৰ অনুসৰি, এইমছৰ নাম সলনি কৰাৰ প্ৰস্তাৱ সন্দৰ্ভত কৰ্তৃপক্ষই জানিব বিচাৰিছিল শিক্ষকসকলৰ মতামত।

ইয়াৰে গৰিষ্ঠসংখ্যকে এই প্ৰতিষ্ঠানটোৰ নাম সলনি কৰাৰ বিৰোধিতা কৰে। ইয়াৰ পিছতে দিল্লী এইমছে কেন্দ্ৰীয় স্বাস্থ্যমন্ত্ৰীলৈ এখন পত্ৰ প্ৰেৰণ কৰে। চৰকাৰে প্ৰস্তাৱ কৰা নাম সলনিৰ বিৰোধিতা কৰি বৃহস্পতিবাৰে প্ৰেৰণ কৰা এই পত্ৰত লিখা আছে যে চিকিৎসা শিক্ষা, গৱেষণা আৰু সেৱাৰ তিনিটা উদ্দেশ্য লৈ ১৯৫৬ চনত দিল্লী এইমছৰ সৃষ্টি হৈছিল।

ইতিহাস আৰু পৰিচিতি এই নামৰ লগত জড়িত। সেয়ে নাম সলনি কৰিলে দেশৰ বাহিৰত আৰু ভিতৰত এই প্ৰতিষ্ঠানটোৱে স্বীকৃতি হেৰুৱাব। কৰ্তৃপক্ষই আৰু ব্যাখ্যা কৰে যে এই কাৰণেই অক্সফৰ্ড, কেম্ব্ৰিজ, হাৰ্ভাৰ্ড বিশ্ববিদ্যালয়ৰ দৰে শতিকা পুৰণি প্ৰতিষ্ঠানসমূহে কেতিয়াও নিজৰ নাম সলনি কৰাৰ কথা ভবা নাই।

এনে সকলো ব্যাখ্যাৰে দেশৰ প্রথম প্রধানমন্ত্রীৰ কার্যকালত সৃষ্টি হোৱা প্রতিষ্ঠানটোৰ নাম সলনি কৰাৰ প্রস্তাৱৰ বিৰোধিতা কৰে এইমছ কর্তৃপক্ষই৷

উল্লেখ্য, দেশৰ সকলো এইমছৰ বাবে কেন্দ্ৰই বিভিন্ন নাম প্ৰস্তাৱ কৰিছে। মোদী চৰকাৰে অঞ্চলটোৰ স্বাধীনতা সংগ্ৰামী, মনীষী বা আন কোনো ঐতিহাসিক নামৰ নামেৰে ২৩টা প্ৰতিষ্ঠানৰ নামকৰণৰ পৰিকল্পনা কৰিছে। চৰকাৰৰ মতে, ইয়াৰ ফলত নিজ নিজ অঞ্চলৰ ভৌগোলিক সজাগতা বৃদ্ধি পাব।