পুৰুষতকৈ বায়ু প্ৰদূষণৰ পৰা অধিক বিপদাশংকা মহিলাৰ

গুৱাহাটী, ২২ ছেপ্টেম্বৰঃ ভাৰতীয় বংশোদ্ভূত গৱেষকৰ এটা দলে জানিব পাৰিছে যে পুৰুষৰ তুলনাত মহিলাৰ বাবে ইন্ধনৰ পৰা নিৰ্গত হোৱা ধোঁৱাই অধিক গুৰুতৰ প্ৰভাব পেলাব পাৰে। কানাডাৰ উইনিপেগৰ মেনিটোবা বিশ্ববিদ্যালয়ৰ ডাঃ হেমশেখৰ মহাদেৱাপ্পা আৰু অধ্যাপক নীলোফাৰ মুখাৰ্জীয়ে গাড়ী-মটৰৰ পৰা ওলোৱা ধোঁৱাৰ সংস্পৰ্শলৈ অহা মানুহৰ তেজৰ পৰিৱৰ্তন দেখিছিল।

মহিলা আৰু পুৰুষ দুয়োৰে ক্ষেত্ৰত, তেওঁলোকে ফুলা, বিষ, সংক্ৰমণ আৰু কাৰ্ডিওভাস্কুলাৰ ৰোগৰ সৈতে সম্পৰ্কিত তেজৰ উপাদানবোৰৰ পৰিৱৰ্তন পাইছিল, কিন্তু তেওঁলোকে পুৰুষতকৈ মহিলাৰ ক্ষেত্ৰত অধিক পৰিৱৰ্তন পাইছিল। কানাডাৰ ভেনকুভাৰৰ ব্ৰিটিছ কলম্বিয়া বিশ্ববিদ্যালয়ত মহাদেৱাপ্পা, মুখাৰ্জী আৰু ক্ৰিছ কাৰ্লষ্টেনৰ গৱেষণা অহা সপ্তাহত স্পেইনৰ বাৰ্চিলোনাত অনুষ্ঠিত হ'বলগীয়া ইউৰোপিয়ান ৰেস্পিৰেটৰী চছাইটি ইণ্টাৰনেচনেল কংগ্ৰেছত উপস্থাপন কৰা হ'ব।

ইপিনে, এই বিষয় সন্দৰ্ভত মহাদেৱাপ্পাই কয় যে, "আমি ইতিমধ্যে জানো যে হাঁওফাঁওৰ ৰোগ যেনে হাপানি আৰু শ্বাসতন্ত্ৰৰ সংক্ৰমণত পুৰুষ আৰু মহিলাৰ মাজত তাৰতম্য আছে। আমাৰ পূৰ্বৰ গৱেষণাই দেখুৱাইছে যে গাড়ী-মটৰৰ পৰা ওলোৱা ধোঁৱা উশাহত লোৱাৰ ফলত হাঁওফাঁওত ফুলা, বিষ আদিৰ সৃষ্টি হয় আৰু শৰীৰে শ্বাসতন্ত্ৰৰ সংক্ৰমণৰ সৈতে মোকাবিলা কৰাত সমস্যা হয়।" 

আনহাতে, নতুন অধ্যয়নটোত ১০ জন স্বেচ্ছাসেৱক (৫ গৰাকী মহিলা আৰু ৫ জন পুৰুষ) অন্তৰ্ভুক্ত আছিল, যিসকল সম্পূর্ণ স্বাস্থ্যৱান আৰু ধূমপান নকৰা লোক আছিল। প্ৰতিজন স্বেচ্ছাসেৱকে চাৰি ঘণ্টা ফিল্টাৰ কৰা বায়ু আৰু চাৰি ঘণ্টা বায়ুত তিনিটা পৃথক ঘনত্বত গাড়ী-মটৰৰ পৰা ওলোৱা ধোঁৱা থকা পৰিৱেশত উশাহ লৈ সময় অতিবাহিত কৰিছিল, প্ৰতিটো পৰীক্ষাৰ মাজত চাৰি সপ্তাহৰ বিৰতি আছিল। স্বেচ্ছাসেৱকসকলে প্ৰতিটো সংস্পৰ্শলৈ অহাৰ ২৪ ঘণ্টা পিছত ৰক্তৰ নমুনা দান কৰিছিল আৰু গৱেষকসকলে স্বেচ্ছাসেৱকসকলৰ ৰক্ত প্লাজমাৰ বিতং পৰীক্ষা কৰিছিল। 

যেতিয়া স্বেচ্ছাসেৱকসকল ধোঁৱাৰ উচ্চ স্তৰৰ সংস্পৰ্শলৈ আহিছিল তেতিয়া এই পাৰ্থক্যবোৰৰ কিছুমান স্পষ্ট হৈ পৰিছিল। এইবোৰ প্ৰাথমিক ফলাফল, অৱশ্যে ই দেখুৱায় যে পুৰুষৰ তুলনাত মহিলাৰ শৰীৰত ধোঁৱাৰ সংস্পৰ্শলৈ অহাৰ ফলত বেছিকৈ প্ৰভাৱ দেখুৱাইছে আৰু ই সূচায় যে পুৰুষতকৈ মহিলাৰ ক্ষেত্রত বায়ু প্ৰদূষণ অধিক বিপদজনক। এইটো গুৰুত্বপূৰ্ণ কিয়নো হাপানীৰ দৰে শ্বাস-প্ৰশ্বাসৰ ৰোগে মহিলা আৰু পুৰুষক পৃথকভাৱে প্ৰভাৱিত কৰে, মহিলাসকলে গুৰুতৰ হাপানিত ভোগাৰ সম্ভাৱনা অধিক যি চিকিৎসাৰ প্ৰতি সঁহাৰি নিদিয়ে। সেয়েহে, মহিলা আৰু পুৰুষে বায়ু প্ৰদূষণৰ প্ৰতি কেনেদৰে সঁহাৰি দিয়ে আৰু তেওঁলোকৰ শ্বাস-প্ৰশ্বাসৰ ৰোগ প্ৰতিৰোধ ক্ষমতা নিৰ্ণয় আৰু চিকিৎসা ইয়াৰ বাবে কিমান গুৰুত্বপূৰ্ণ সেই বিষয়ে অধিক অৱগত হোৱা উচিত। 

ডেনমাৰ্কৰ কোপেনহেগেন বিশ্ববিদ্যালয়ৰ অধ্যাপক জ'ৰানা এণ্ডাৰছেনে কয়, "বায়ু প্ৰদূষণে কেনেকৈ আৰু কিয় দুৰ্বল স্বাস্থ্যত অৰিহণা যোগায় সেয়াও আমি বুজিব লাগিব। এই অধ্যয়নটোৱে ডিজেল নিষ্কাশনৰ প্ৰতি শৰীৰে কেনে প্ৰতিক্ৰিয়া কৰে আৰু মহিলা আৰু পুৰুষৰ মাজত কেনেদৰে পাৰ্থক্য হ'ব পাৰে তাৰ বিষয়ে কিছু গুৰুত্বপূৰ্ণ অন্তৰ্দৃষ্টি প্ৰদান কৰে।"