দলীয় সভাপতি হ’লে ৰাজস্থানৰ মুখ্যমন্ত্ৰী পদ ত্যাগ কৰিব অশোক গেহলটে

গুৱাহাটী,২৩ ছেপ্টেম্বৰ:ৰাজস্থানৰ মুখ্যমন্ত্ৰী অশোক গেহলটে কংগ্ৰেছৰ সভাপতি পদত প্ৰতিদ্বন্দিতা কৰিব বিচাৰিলেও ৰাজস্থানৰ মুখ্যমন্ত্ৰী পদটো এৰি দিব বিচৰা নাই । এই অভিযোগৰ ওপৰত আজি স্বয়ং ৰাহুল গান্ধীয়ে কয় যে, ‘এজন ব্যক্তি, এক পদ’। কালি দুপৰীয়া ছোনিয়া গান্ধীয়ে কিছু কোমল স্থিতি গ্ৰহণ কৰি গেহলটক কৈছিল, প্ৰথমে গেহলট সভাপতি হওক। তাৰ পিছত মুখ্যমন্ত্ৰীৰ পদৰ সিদ্ধান্ত লোৱা হ’ব। কিন্তু উদয়পুৰ থিংক টেংকত ‘এজন ব্যক্তি, এজন পদ’ নিয়মৰ সন্দৰ্ভত সোধা প্ৰশ্নৰ উত্তৰত আজি ৰাহুলে কয় যে আমি উদয়পুৰত লোৱা সিদ্ধান্তৰ প্ৰতি সদায়ে জবাবদিহি হৈ থাকিম ।

সভাপতি পদটো দখল কৰিবলৈ সন্মত হোৱাৰ পিছতো ইমান দিনে মুখ্যমন্ত্ৰী পদ এৰিবলৈ অনিচ্ছুক গেহলটে আজি নিজৰ সুৰ সলনি কৰিলে। তেওঁ কয়,“ৰাজ্যৰ মুখ্যমন্ত্ৰী পদৰ লগতে কংগ্ৰেছৰ সভাপতি পদৰ কাৰ্যপন্থাৰ ক্ষেত্ৰত ন্যায় প্ৰদান কৰিব নোৱাৰি । কাৰণ, কংগ্ৰেছ সভাপতিৰ কাম হ’ব দেশত দলটোক শক্তিশালী কৰা । তেওঁ কেনেকৈ দুটা পদত অধিষ্ঠিত হ'ব পাৰে? আনকি বিগত সময়তো কোনো কংগ্ৰেছ সভাপতিয়ে এখন ৰাজ্যৰ মুখ্যমন্ত্ৰী পদত অধিষ্ঠিত হোৱা নাই।”

কংগ্ৰেছৰ সূত্ৰ অনুসৰি দলৰ সভাপতিগৰাকীয়ে এটাতকৈ অধিক পদত অধিষ্ঠিত হ’লে পুনৰ বিসম্বাদী শিৱিৰত যোগদান কৰিব ক্ষুব্ধ নেতাৰ এটা দলে । গেহলটে যদি সভাপতিৰ লগতে মুখ্যমন্ত্ৰীৰ পদত অধিষ্ঠিত হয় তেন্তে তেওঁলোকে ‘অংশকালীন ৰাষ্ট্ৰপতি’ক লৈ প্ৰশ্ন উত্থাপন কৰিব। সেই ইংগিত পোৱাৰ পিছতো গেহলটে নিজৰ সুৰ সলনি কৰিবলগীয়া হৈছিল। বিসম্বাদী জি-২৩ নেতাসকলৰ ভিতৰত শশী থাৰুৰে ইতিমধ্যে সভাপতি নিৰ্বাচনত প্ৰতিদ্বন্দ্বিতা কৰাৰ ইংগিত দিছে। তিৰুৱানন্তপুৰমৰ সাংসদ থাৰুৰে শেহতীয়াকৈ ছোনিয়া গান্ধীক সাক্ষাৎ কৰে।