চিবিআয়ে গ্ৰেপ্তাৰ কৰিলে গুৱাহাটীৰ জিএছটিৰ এ পি এল বিভাগৰ আয়ুক্ত শক্তিৱেল ৰাজুক

গুৱাহাটী, ২৯ ছেপ্টেম্বৰ :বিগত দিনকেইটাত দেশৰ বিভিন্ন প্ৰান্তৰ লগতে অসমতো চি বি আয়ে বিভিন্ন গোচৰত তীব্ৰ অভিযান চলাই আছে । এই অভিযানৰ সময়ত চি বি আয়ে বহু লোকক গ্ৰেপ্তাৰ কৰিছে । এই অভিযানৰ মাজতে বুধবাৰে নিশা হঠাতে জি এছ টি ফাঁকিৰ গোচৰত গুৱাহাটীৰ আঠগাঁওস্থিত জি এছ টি ভৱনত চি বি আয়ে চলায় অভিযান।

জি এছ টি ভৱনত কোনো বাহিৰা লোক প্ৰৱেশ কৰিব নোৱাৰাকৈ চলোৱা এই অভিযান আজি পুৱালৈকে অব্যাহত থাকে । এই অভিযানৰ অন্তত চি বি আয়ে গ্ৰেপ্তাৰ কৰে গুৱাহাটীৰ জি এছ টিৰ এ পি এল বিভাগৰ আয়ুক্ত শক্তিৱেল ৰাজুক । ইয়াৰ উপৰি আন এজন ব্যক্তিকো চি বি আয়ে গ্ৰেপ্তাৰ কৰা বুলি জানিব পৰা গৈছে ।

আনহাতে, চি বি আয়ে শক্তিৱেল ৰাজুৰ গৃহৰ পৰা জব্দ কৰিছে নগদ ৩ লাখ টকা । ইয়াৰ উপৰি জব্দ কৰিছে বহু আপত্তিজনক নথি-পত্ৰ । উল্লেখ্য যে শক্তিৱেল ৰাজু এ পি এল বিভাগৰ আয়ুক্ত হিচাপে কৰ্মৰত আছিল । চি বি আইৰ ১২জনীয়া দলে চলাইছিল জি এছ টি ভৱনত এই অভিযান ।