ড্ৰাগছ সেৱন কৰা অভিযোগত শ্ৰদ্ধা কাপুৰৰ ভায়েকক আটক

গুৱাহাটী, ১৩ জুনঃ বলীউড অভিনেতা শক্তি কাপুৰৰ পুত্ৰ আৰু অভিনেত্ৰী শ্ৰদ্ধা কাপুৰৰ ভায়েক সিদ্ধান্ত কাপুৰক ড্ৰাগছ সেৱন কৰাৰ গোচৰত জিম্মাত লোৱা হৈছে। চিকিৎসা পৰীক্ষাই ড্ৰাগছ গ্ৰহণ কৰাৰ কথা নিশ্চিত কৰিছে আৰু এই ক্ষেত্ৰত তেওঁক বাংগালুৰৰ উলাচুৰু আৰক্ষী চকীলৈ লৈ যোৱা হৈছে।

সিদ্ধান্তেও চলচ্চিত্ৰ জগতত আহিবলৈ চেষ্টা কৰিছিল, কিন্তু তেওঁ দেউতাক আৰু ভনীয়েকৰ দৰে সফল হ'ব পৰা নাছিল। 

সিদ্ধান্তে বহুতো চলচ্চিত্ৰত সৰু চৰিত্ৰত অভিনয় কৰিছে। তাৰকা-সন্তান হোৱা স্বত্বেও, সিদ্ধান্ত কাপুৰে ডিস্ক জকী হিচাপে কৰ্মজীৱন আৰম্ভ কৰে আৰু পিছত হিন্দী চলচ্চিত্ৰৰ বিখ্যাত পৰিচালকসকলৰ সৈতে হিন্দী চলচ্চিত্ৰত সহকাৰী পৰিচালক হিচাপে কাম কৰে। সহকাৰী পৰিচালক হিচাপে, সিদ্ধান্তে 'ভুল ভুল্লায়া', 'ভাগ-ভাগ', 'চুপ চুপ কে', 'ঢোল' আদি চলচ্চিত্ৰত কাম কৰিছে। 

সিদ্ধান্ত কাপুৰে 'শ্বুটআউট এট ৱাডালা' চলচ্চিত্ৰৰ জৰিয়তে আত্মপ্ৰকাশ কৰে, য'ত ছবিখনত মুখ্য চৰিত্ৰত অভিনয় কৰিছিল অনিল কাপুৰ, কংগনা ৰাণাৱত আৰু জন আব্ৰাহামে। ইয়াৰ পিছত, সিদ্ধান্তে অনুৰাগ কাশ্যপৰ দ্বাৰা পৰিচালিত মনস্তাত্ত্বিক থ্ৰিলাৰ ছবি 'অগলি'ত অভিনয় কৰিছে। 

সিদ্ধান্তে তেওঁৰ ভগ্নী শ্ৰদ্ধা কাপুৰৰ সৈতে চিনেমাত একেলগে কাম কৰিছে, দুয়োজনকে 'হাছিনা পাৰ্কাৰ' বোলছবিখনত একেলগে দেখা গৈছিল য'ত শ্ৰদ্ধাই দাউদৰ ভগ্নীৰ চৰিত্ৰত অভিনয় কৰিছিল, আনহাতে সিদ্ধান্তই ছবিখনত দাউদৰ চৰিত্ৰত অভিনয় কৰিছিল। কিন্তু, ছবিখনে বক্স-অফিচত কোনোধৰণৰ আশ্চৰ্যজনক প্ৰদৰ্শন দেখুৱাব নোৱাৰিলে।