চৰাইদেউ জিলা কাৰাগাৰত অষ্টম বাৰ্ষিক আন্তঃৰাষ্ট্ৰীয় যোগ দিৱস উদযাপিত

সোণাৰি, ২১ জুন: ৰাষ্ট্ৰীয় আয়ুস অভিযানৰ সৌজন্যত, চৰাইদেউ জিলা কাৰাগাৰৰ উদ্যোগত আৰু ভাৰতীয় যোগ সংস্কৃতি আৰু যোগ চিকিৎসা কেন্দ্ৰ (Indian Yoga Culture and Yoga Therapy Centre)-ৰ সহযোগত আজি পুৱা ৯ বজাত সোণাৰিস্থিত চৰাইদেউ জিলা কাৰাগাৰত অষ্টম আন্তঃৰাষ্ট্ৰীয় যোগ দিৱস উদযাপন কৰা হয়। আজিৰ অনুষ্ঠানত জিলা আইন সেৱা প্ৰাধিকৰণেও অংশগ্ৰহণ কৰে। 

জিলা কাৰাগাৰৰ অধ্যক্ষ হবিবুৰ ৰহমান বৰভূঞাই অনুষ্ঠানটিৰ শুভ উদ্বোধন কৰি যোগ সম্পৰ্কে তাত্ত্বিক ব্যাখ্যা আগবঢ়োৱাৰ লগতে মানৱ ব্যক্তিত্বৰ মনোদৈহিক দিশসমূহৰ বিষয়ত যোগৰ সুপ্ৰভাৱ সম্পৰ্কে অৱগত কৰে। 

ভাৰতীয় যোগ সংস্কৃতি আৰু যোগ চিকিৎসা কেন্দ্ৰৰ অন্তৰ্গত জিলা কাৰাগাৰৰ যোগ শিক্ষকসকলৰ দ্বাৰা আয়ুস মন্ত্ৰালয়ৰ অনুমোদিত Common Yoga Protocol -ৰ অভ্যাস অনুষ্ঠানটিত কৰা হয়। 

যোগ শিক্ষক দীপক গগৈয়ে আঁত ধৰা অনুষ্ঠানটিত যোগ শিক্ষয়িত্ৰী ৰিনিজিনি খনিকৰ, যোগ সহায়ক হিৰন্ময় বুঢ়াগোহাঁই তথা আৰ্ট অফ লিভিঙৰ যোগ প্ৰশিক্ষক অৰুণ বৰগোঁহাই, পুলিন বৰগোঁহাই, যীশুকৃষ্ণ বৰগোঁহাইৰ উপৰিও কাৰাগাৰ কৰ্তৃপক্ষৰ হৈ সহকাৰী কাৰাধ্যক্ষ ভাস্কৰ হাজৰিকা আৰু সঞ্জীৱ গগৈ উপস্থিত থাকে।