নিটি আয়োগৰ নতুন মুখ্য কাৰ্যবাহী বিষয়াৰ পদত নিযুক্তি দিয়া হ'ল পৰমেশ্বৰণ আয়াৰক

গুৱাহাটী,২৬ জুন:দেশৰ প্ৰাক্তন প্রশাসনিক বিষয়া পৰমেশ্বৰণ আয়াৰক নিটি আয়োগৰ মুখ্য কার্যবাহী বিষয়া হিচাপে নিযুক্তি দিয়া হৈছে। আজি ভাৰতৰ কৰ্মচাৰী আৰু প্রশিক্ষণ বিভাগে এক বিবৃতি যোগে এই ঘোষণা কৰিছে। নিটি আয়োগৰ বৰ্তমানৰ মুখ্য কাৰ্যবাহী বিষয়া অমিতাভ কান্তৰ স্থানত আয়াৰৰ নিযুক্তিত ইতিমধ্যে কেবিনেটৰ নিযুক্তি সমিতিয়ে অনুমোদন জনাইছে বুলি এক চৰকাৰী অধিসূচনাত উল্লেখ কৰা হৈছে।উল্লেখ্য যে অমিতাভ কান্তক ২০১৬ চনৰ ১৭ ফেব্ৰুৱাৰীত দুবছৰীয়া কাৰ্যকালৰ বাবে নিটি আয়োগৰ মুখ্য কাৰ্যবাহী বিষয়া হিচাপে নিযুক্ত কৰা হৈছিল। অৱশ্যে পিছত তেওঁৰ কাৰ্যকাল সম্প্ৰসাৰণ কৰা হৈছিল। 

উল্লেখ্য যে ১৯৮১ চনৰ বেটছৰ আইএএছ বিষয়া পৰমেশ্বৰণ আয়াৰে ২০০৯ চনত ভাৰতীয় অসামৰিক সেৱাৰ পৰা স্বেচ্ছামূলকভাৱে অৱসৰ গ্ৰহণ কৰিছিল। ইয়াৰ পিছতে তেওঁ সেই বৰ্ষতে বিশ্ব বেংকৰ জল সম্পদ শাখাৰ মেনেজাৰ হিচাপে নিযুক্ত হয়।আয়াৰে ২০১৬ চনত খোৱা পানী আৰু অনাময় মন্ত্ৰালয়ত সচিব হিচাপে যোগদান কৰে।যোৱা বৰ্ষত তেওঁ জল শক্তি মন্ত্ৰালয়ৰ খোৱা পানী আৰু অনাময় বিভাগৰ সচিব পদৰ পৰা পদত্যাগ কৰে।