উদয়পুৰ হত্যাকাণ্ডত সমৰ্থন কৰাত অসমৰ এজন লোকক গ্ৰেপ্তাৰ

গুৱাহাটী, ২ জুলাইঃ ৰাজস্থানৰ উদয়পুৰত দৰ্জী কানহাইয়া লালক নিৰ্মমভাৱে হত্যা কৰাত সমৰ্থন কৰাৰ অভিযোগত ৰাজ্যৰ হাইলাকান্দি জিলাত এজন লোকক গ্ৰেপ্তাৰ কৰা হৈছে বুলি আৰক্ষীয়ে কয়।

কাটলিচেৰা অঞ্চলৰ বাসিন্দা, চামছুল লস্কৰক এটা ছ'চিয়েল মিডিয়া ৱেবছাইটত মন্তব্য কৰাৰ বাবে গ্ৰেপ্তাৰ কৰা হৈছে, য'ত তেওঁ হত্যাকাণ্ডটো সমৰ্থন কৰিছিল বুলি আৰক্ষীয়ে জনায়।

বৃহস্পতিবাৰে লস্কৰক গ্ৰেপ্তাৰ কৰা হয় আৰু হাইলাকান্দিৰ ভাৰতীয় জনতা যুৱ মৰ্চাৰ সভাপতি মিলন দাসে আৰক্ষীত গোচৰ ৰুজু কৰাৰ পিছত আইপিচিৰ বিভিন্ন ধাৰা আৰু কঠোৰ বেআইনী কাৰ্যকলাপ (প্ৰতিৰোধ) আইনৰ অধীনত লস্কৰৰ বিৰুদ্ধে গোচৰ ৰুজু কৰা হয়। 

সভাপতি দাসে তেওঁৰ অভিযোগত লস্কৰৰ বিৰুদ্ধে এজন আবু চৌধুৰীৰ এটা পোষ্টত এই মন্তব্য কৰাৰ অভিযোগ উত্থাপন কৰে, যিয়ে দৰ্জী কানহাইয়া লালৰ হত্যাত জড়িত অপৰাধীসকলৰ বাবে মৃত্যুদণ্ডৰ দাবী জনাইছিল, আৰক্ষীয়ে কয়।

ৰিয়াজ আখটাৰী আৰু ঘৌচ মহম্মদ নামৰ দুজন ব্যক্তিয়ে ২৮ জুনত উদয়পুৰত থকা তেওঁৰ দোকানত কানহাইয়া লালক নিৰ্মমভাৱে হত্যা কৰিছিল।