৫ বছৰীয়া কাৰ্যকালত ২০৩ খনতকৈও অধিক কেন্দ্ৰীয় বিধেয়কত সন্মতি প্ৰদান কৰিছে ৰামনাথ কোবিন্দে

গুৱাহাটী,১৩ জুলাই:কাৰ্যকাল শেষ হ'বলৈ আৰু কেইটামান দিনহে বাকী আছে ৰাষ্ট্ৰপতি ৰামনাথ কোবিন্দৰ । যোৱা ৫ বছৰত ৰামনাথ কোবিন্দৰ কাৰ্যকাল বিভিন্ন ক্ষেত্ৰত গুৰুত্বপূৰ্ণ হিচাপে বিবেচিত হৈছে । তাৰ ভিতৰত চাবলৈ গ'লে ৰাষ্ট্ৰপতি ৰামনাথ কোবিন্দে তেওঁৰ ৫ বছৰীয়া কাৰ্যকালত ২০৩ খনতকৈও অধিক কেন্দ্ৰীয় বিধেয়কত সন্মতি প্ৰদান কৰিছে । অৱশ্যে চৰকাৰে এতিয়ালৈ সেইবোৰৰ বহুখিনিয়ে আইনলৈ ৰূপান্তৰিত আৰু কাৰ্যকৰী কৰা নাই ।

ইয়াৰে কিছুমান আকৌ ৰাষ্ট্ৰপতিৰ সন্মতিৰ তিনি বছৰৰ পাছতো কাৰ্যকৰী হোৱা নাই । ২০১৯ চনৰ ১২ ডিচেম্বৰত ৰাষ্ট্ৰপতি কোবিন্দে সন্মতি প্ৰদান কৰা নাগৰিকত্ব (সংশোধনী) বিধেয়ক, ২০১৯ এতিয়াও দেশত কাৰ্যকৰী হোৱা নাই । গৃহ মন্ত্ৰালয়ে এতিয়াও ইয়াৰ কাৰ্যকৰীকৰণৰ বাবে নিয়ম প্ৰস্তুত কৰা নাই । এপ্ৰিলত, মন্ত্ৰালয়ে সংসদৰ অধীনস্থ আইনৰ পৰা চি.এ.এ.-ৰ বাবে নিয়ম প্ৰস্তুত কৰাৰ বাবে আৰু ছয় মাহৰ সময় বিচাৰিছিল ।ধৰ্মীয় অত্যাচাৰৰ বলি হৈ চুবুৰীয়া আফগানিস্তান, বাংলাদেশ আৰু পাকিস্তানৰ পৰা অহা হিন্দু, শিখ, বৌদ্ধ, জৈন, খ্ৰীষ্টান আৰু পাৰ্চীকে ধৰি ছয়টা সংখ্যালঘু সম্প্ৰদায়ৰ লোকক ভাৰতীয় নাগৰিকত্ব দিয়াৰ লক্ষ্যৰে চৰকাৰে আইনখন প্ৰৱৰ্তন কৰে । কাৰ মতে, ২০১৪ চনৰ ৩১ ডিচেম্বৰত বা তাৰ পূৰ্বে ভাৰতলৈ অহা প্ৰব্ৰজনকাৰীসকলে ভাৰতীয় নাগৰিকত্ব লাভ কৰিব।