৪২ খন মহাবিদ্যালয়ৰ ৭০ জন সহকাৰী অধ্যাপক তথা গ্রন্থাগাৰিকলৈ উচ্চ শিক্ষা বিভাগে জাৰি কৰিছে চমন

গুৱাহাটী,১৭ জুলাই:নতুনকৈ প্রাদেশিকীকৰণ হোৱা ৰাজ্যৰ ৪২ খন মহাবিদ্যালয়ৰ ৭০ জন সহকাৰী অধ্যাপক তথা গ্রন্থাগাৰিকৰ নথি পৰীক্ষণৰ বাবে উচ্চ শিক্ষা বিভাগে জাৰি কৰিছে চমন। নিৰ্দেশনা পত্ৰৰ জৰিয়তে কলেজ শিক্ষকক অহা ১৯ জুলাইত উচ্চ শিক্ষা সঞ্চালকৰ কাৰ্যালয়ত হাজিৰ হ'বলৈ নিৰ্দেশ দিয়া হৈছে। প্ৰাদেশিকীকৰণৰ জৰিয়তে সহকাৰী অধ্যাপক আৰু গ্ৰন্থাগাৰিকৰ পদত সেৱা আগবঢ়াই থকা এইসকল চাকৰিয়ালে ৰাজ্য চৰকাৰে বিগত বৰ্ষত স্নাতকোত্তৰ ডিগ্ৰী আৰু পি এইচ ডি ডিগ্ৰী পৰীক্ষণৰ বাবে গঠন কৰি দিয়া স্ক্রীনিং কমিটীৰ সন্মুখত হাজিৰ হ'ব লাগিব। ডিব্ৰুগড় বিশ্ববিদ্যালয়ৰ প্ৰাক্তন উপাচার্য অধ্যাপক অলক কুমাৰ বুঢ়াগোহাঁইৰ অধ্যক্ষতাত গঠিত স্ক্রীনিং কমিটীয়ে এই ৭০ জন কলেজ শিক্ষকৰ নথি-পত্ৰ পৰীক্ষণ কৰিব। এইসকল সহকাৰী অধ্যাপক গ্রন্থাগাৰিকে স্ক্রীনিং কমিটীৰ সন্মুখত শিক্ষাগত অৰ্হতাৰ মাৰ্কশ্বিট, প্ৰমাণপত্ৰ, মহাবিদ্যালয়ৰ জইনিং লেটাৰৰ প্ৰকৃত নথি-পত্ৰ প্ৰদৰ্শন কৰিব লাগিব। বিশেষকৈ পি এইচ ডি ডিগ্ৰীৰ সকলো নথিপত্র, যেনে— পি এইচ ডি ডিগ্ৰীৰ ফলাফলৰ জাননী, প্রমাণপত্র, পি এইচ ডিৰ পঞ্জীয়নপত্র,গৱেষণা পত্র, গৱেষণা বিষয় সন্দৰ্ভত প্রকাশিত লেখা আদিৰ 'অৰিজিনেল কপি' স্ক্রীনিং কমিটীক দেখুৱাব লাগিব। জমা দিব লাগিব এই নথিসমূহৰ ফটোষ্টেট কপি। অহা ১৯ জুলাইৰ আগবেলা ১০.৩০ বজাৰ পৰা ৩৫ জন আৰু পিচবেলা ১.৩০ বজাৰ পৰা ৩৫ জন কলেজ শিক্ষকৰ নথিপত্র পুনৰীক্ষণ কৰিব স্ক্রীনিং কমিটীখনে। 

লক্ষণীয়ভাবে উচ্চ শিক্ষা সঞ্চালকে জাৰি কৰা নিৰ্দেশনাখনত সন্নিৱিষ্ট হোৱা তালিকাত কৰিমগঞ্জৰ নিলমবাজাৰ কলেজৰ দুজন শিক্ষক, কামৰূপৰ এছ বি এম এছ কলেজৰ এজন, ছমৰীয়া আঞ্চলিক কলেজৰ এজন, ধুবুৰীৰ বিলাসীপাৰা কলেজৰ এজন, ওদালগুৰি কলেজৰ এজন, নলবাৰীৰ ছহিদ স্মৃতি মহাবিদ্যালয়ৰ এজন, ধুবুৰীৰ এ আৰ কলেজৰ পাঁচজন শিক্ষকৰ নাম অন্তর্ভুক্ত হৈছে। একেদৰে গোৱালপাৰাৰ আগিয়া কলেজৰ এজন, কামৰূপৰ বি চি মেধি কলেজৰ এজন, বৰপেটাৰ বি এইচ কলেজৰ এজন, কামৰূপৰ বামুন্দী মহাবিদ্যালয়ৰ এজন, লখিমপুৰৰ ব্ৰহ্মপুত্র ডিগ্রী কলেজৰ এজন সহকাৰী অধ্যাপক নথি পৰীক্ষণৰ বাবে উচ্চ শিক্ষা সঞ্চালকালয়ত উপস্থিত হ'বলৈ নিৰ্দেশ দিয়া হৈছে। বিশ্বনাথৰ চতিয়া কলেজৰ এজন,দৰঙৰ দেওমৰনৈ ডিগ্রী কলেজৰ এজন, ধেমাজিৰ ছোৱালী কলেজৰ এজন, বৰপেটাৰ হৰেন্দ্ৰ চিত্ৰ কলেজৰ এজন, বাক্সাৰ জ্ঞানপীঠ ডিগ্রী কলেজৰ এজন, ধুবুৰীৰ হালাকুৰা কলেজৰ এজন, হাতীধুৰা কলেজৰ দুজন, লখিমপুৰ হাৰ্হি কলেজৰ দুজন, দক্ষিণ শালমাৰাৰ হাটশিঙিমাৰী কলেজৰ এজন, নগাঁৱৰ কটাহগুৰি কলেজৰ এজন শিক্ষকলৈ প্ৰেৰণ কৰা হৈছে চমন। তিনিচুকীয়াৰ লিডু কলেজৰ দুজন, গোৱালপাৰাৰ জলেশ্বৰ কলেজৰ তিনিজন, লখিমপুৰৰ লালুক কলেজৰ এজন, নগাঁৱৰ মোৰাঝাৰ কলেজৰ এজন দৰঙৰ মঙলদৈ কমাৰ্চ কলেজৰ তিনিজন, কামৰূপৰ ৰামপুৰ আঞ্চলিক কলেজৰ এজন, বঙাইগাঁৱৰ ৰাজীৱ গান্ধী কলেজৰ তিনিজন, বাক্সাৰ শালবাৰী কলেজৰ এজন, বৰপেটাৰ এছ এছ মাধব কলেজৰ দুজন, কাৰ্বি আংলং ৰাংচিনা কলেজৰ এজন, ধেমাজিৰ চিমেন চাপৰি কলেজৰ ছজন, চিলাপথাৰ টাউন কলেজৰ এজন, চিচিবৰগাঁও কলেজৰ এজন শোণিতপুৰৰ টি এইচ বি কলেজৰ এজন, কামৰূপৰ সোণতলী আঞ্চলিক কলেজৰ দুজন শিক্ষকৰ নথি পৰীক্ষা কৰিব স্ক্রীনিং কমিটীয়ে। দক্ষিণ শালমাৰা কলেজৰ তিনিজন, নলবাৰীৰ উত্তৰ কামপীঠ কলেজৰ এজন, কামৰূপৰ বিদ্যাভাৰতী কলেজৰ চাৰিজন, উত্তৰ বৰপেটা কলেজৰ এজন, শিৱসাগৰৰ সোণাৰি কমার্চ কলেজৰ এজন, ধেমাজিৰ চিলাপথাৰ ছায়েন্স কলেজৰ এজন শিক্ষকৰ পি এইচ ডি তথা শিক্ষাগত অৰ্হতা পৰীক্ষণৰ ব্যৱস্থা কৰিছে উচ্চ শিক্ষা বিভাগে। 

উল্লেখযোগ্য যে ইয়াৰ পূৰ্বেও কলেজ শিক্ষকৰ নথি পুনৰীক্ষণ কৰিছিল স্ক্ৰীনি কমিটীখনে। কিন্তু এইবাৰ অন্যান্য শিক্ষাগত অৰ্হতাৰ সমান্তৰালভাৱে পি এইচ ডি সংক্রান্তীয় সমগ্ৰ নথি পৰীক্ষণৰ ব্যৱস্থা কৰাক লৈ শিক্ষক সমাজৰ মাজত সৃষ্টি হৈছে ব্যাপক চর্চা। কিয়নো বিগত সময়ছোৱাত ভুৱা পি এইচ ডিক লৈ সৃষ্টি হৈ আহিছে প্রতিক্ৰিয়াৰ ভুৱা পি এইচ ডিৰে একাংশ কলেজ শিক্ষকে বছৰ বছৰ ধৰি চাকৰি কৰি অহাৰ লগতে অন্যান্য সা-সুবিধাও গ্রহণ কৰাক লৈ ৰাজ্যজুৰি অব্যাহত আছে চৰ্চাৰ।