ৰাতিপুৱা ৯.৩০ বজাত আৰম্ভ হ'ল গোচৰৰ শুনানি, দুপৰীয়া ২ বজাত পৰিল অন্ত

গুৱাহাটী,১৫ জুলাই:উচ্চতম ন্যায়ালয়ে সাধাৰণতে ৰাতিপুৱা ১০.৩০ বজাত গোচৰৰ শুনানি আৰম্ভ কৰে, কিন্তু শুক্ৰবাৰে ন্যায়াধীশ ললিতৰ নেতৃত্বত এখন বিচাৰপীঠ এঘণ্টা আগতে একত্ৰিত হৈছিল আৰু ৰাতিপুৱা ৯.৩০ বজাত বিচাৰ আৰম্ভ কৰিছিল।আগষ্ট মাহত ভাৰতৰ মুখ্য ন্যায়াধীশ হোৱাৰ প্ৰৱল দাবীদাৰ ন্যায়াধীশ গৰাকীয়ে শুনানিৰ সময়ত কৈছিল যে যদি শিশুসকলে প্ৰতিদিনে ৰাতিপুৱা ৭ বজাত বিদ্যালয়লৈ যাব পাৰে, তেন্তে ন্যায়াধীশ আৰু অধিবক্তাসকলে ৰাতিপুৱা ৯ বজাত আদালতলৈ কিয় আহিব নোৱাৰে। 

ন্যায়াধীশ ললিতে লগতে কয়, "আদৰ্শগতভাৱে আমি ৰাতিপুৱা ৯ বজাতহে বহিব লাগে। মই সদায় কৈ আহিছো যে যদি আমাৰ ল'ৰা-ছোৱালীয়ে ৰাতিপুৱা ৭ বজাত বিদ্যালয়লৈ যাব পাৰে, তেন্তে আমি ৯ বজাত আদালতলৈ কিয় আহিব নোৱাৰো?"

ন্যায়াধীশ ললিতৰ লগতে ন্যায়াধীশ এছ ৰবীন্দ্ৰ ভাট আৰু সুধাংশু ধুলিয়াক লৈ গঠিত বিচাৰপীঠখনে পুৱা ৯.৩০ বজাত গোচৰৰ শুনানি আৰম্ভ কৰিছিল।ন্যায়াধীশ ললিতে লগতে কয় যে আদালতবোৰ ৰাতিপুৱা ৯.০০-১১.৩০ বজালৈকে চলাৰ পিছত আধা ঘণ্টাৰ বিৰতি ল'ব লাগে আৰু তাৰ পিছত পুনৰ দুপৰীয়া ১২ বজাত আকৌ একত্ৰিত হৈ দুপৰীয়া ২ বজালৈকে চলিব পাৰে ।