খুড়াকে ষড়যন্ত্ৰ কৰি বিয়া ভাঙিছিল ৰাজেশ খান্না আৰু ডিম্পল কাপদিয়াৰঃ বিচ্ছেদক লৈ মুখ খুলিলে কাপদিয়াই

গুৱাহাটী,১৯ জুলাই:ষাঠিৰ দশকত বলীউডৰ অন্যতম জনপ্ৰিয় তথা ৰোমান্টিক ছুপাৰ ষ্টাৰ আছিল ৰাজেশ খান্না। ৰূপালী পৰ্দাত ৰাজেশে নিজৰ অভিনয়েৰে যথেষ্ট আধিপত্য বিস্তাৰ কৰিছিল। তেওঁ এসময়ত একেলগে বেক টু বেক ১৫ খন ছুপাৰ হিট ছবি প্ৰদান কৰি অভিলেখ গঢ়িছিল।সফলতাৰ উচ্চতাত থকা ৰাজেশ খান্নাই ১৬ বছৰীয়া ডিম্পল কাপদিয়াৰ প্ৰেমত পৰিছিল আৰু তেওঁক বিয়া কৰাইছিল । ডিম্পল তেতিয়া ৰাজ কাপুৰৰ ‘ববি’ ছবিৰ নায়িকা আছিল। বিয়াৰ পিছত ডিম্পলে ছবিত অভিনয় ত্যাগ কৰিছিল কিন্তু কিছুদিনৰ পাছত তেওঁ পুনৰ ৰূপালী পৰ্দালৈ ঘূৰি আহিছিল কাৰণ সেই সময়ত ৰাজেশৰ সৈতে তেওঁৰ বিবাহ বিচ্ছেদ হৈছিল।

বিবাহ বিচ্ছেদৰ কঠিন অভিজ্ঞতাক লৈ কাপদিয়াই কৈছিল,"মোৰ বিষয়ে ৰাজেশৰ খুড়াকৰ ভুল বুজাবুজি হৈছিল,শেষত ৰাজেশেও মোক ভুল বুজিছিল । এই ভুল বুজাবুজিয়ে আমাৰ সম্পৰ্ক ভাঙি পেলালে। তেওঁৰ পৰা বিচ্ছিন্ন হ’লেও তেওঁৰ প্ৰতি থকা মৰম আৰু সন্মান এতিয়াও মোৰ অপৰিসীম। মই বৰ ৰোমান্টিক আৰু আৱেগিক। আগতে ৰাজেশৰ সকলো ছবি চাইছিলোঁ। মহিলাসকল তেতিয়া তেওঁক লৈ পাগল হৈ পৰিছিল। মইও তেওঁৰ ৰোমান্টিক ইমেজটোৰ প্ৰেমত পৰিছিলোঁ আৰু তেওঁক বিয়া কৰাবলৈ মই পাগল হৈছিলোঁ। ৰাজেশৰ লগত বিয়া হোৱাত দেউতাৰো কোনো আপত্তি নাছিল। ৰাজেশৰ আগতে যেতিয়া মই আন এজন পুৰুষক বিয়া কৰাব বিচাৰিছিলো, তেতিয়া দেউতাই মান্তি হোৱা নাছিল। কিন্তু ৰাজেশৰ ক্ষেত্ৰত তেওঁ লগে লগে মান্তি হ’ল।”