ইউক্ৰেইনৰ সৈতে যুদ্ধ জিকিবলৈ ব্যাকুল হৈ পৰিছে পুটিনঃ কিম জঙৰ পৰা বিচাৰিলে ১ লাখ সৈনিক

গুৱাহাটী, ৬ আগষ্টঃ ৰাছিয়াৰ ৰাষ্ট্ৰপতি ভ্লাদিমিৰ পুটিনে ইউক্ৰেইন আক্ৰমণত সহায়ৰ বাবে উত্তৰ কোৰিয়াৰ একনায়ক কিম জং উনৰ ওচৰলৈ যোৱাৰ কথা বিবেচনা কৰি আছে। ৰাছিয়াৰ বিশেষ প্ৰতিবেদন অনুসৰি, পুটিনে ১,০০,০০০ সৈন্যৰ বিনিময়ত কিম জঙক শক্তি আৰু শস্য প্ৰদান কৰিবলৈ সাজু হৈছে। 

উত্তৰ কোৰিয়াই 'কূটনৈতিক মাধ্যম'ৰ জৰিয়তে স্পষ্ট কৰি দিছে যে দেশখনে যুদ্ধত ৰাছিয়াক সহায় কৰিবলৈ সাজু। উত্তৰ কোৰিয়াই কৈছে যে, "আমি মস্কোৰ ফালে ইউক্ৰেইনৰ বিৰুদ্ধে এক বৃহৎ যুঁজাৰু সেনা বাহিনী প্ৰেৰণ কৰিবলৈ সাজু। তেওঁলোকক ডনেটস্ক পিপলছ ৰিপাব্লিক (ডিপিআৰ) আৰু লুহানস্ক পিপলছ ৰিপাব্লিক (এলপিআৰ)ৰ বাহিনীত নিয়োজিত কৰা হ'ব। 

ক্ৰেমলিন পন্থী সংবাদ সংস্থাই জনাইছে যে উত্তৰ কোৰিয়াই দেশখনৰ ১,০০,০০০ সৈন্য স্থানান্তৰ কৰিবলৈ সাজু। ইয়াৰ বিনিময়ত, কিমৰ অৰ্থনীতিলৈ খাদ্য আৰু শক্তি যোগান ধৰা হ'ব। মস্কোৰ এজন আগশাৰীৰ প্ৰতিৰক্ষা বিশেষজ্ঞ ৰিজাৰ্ভ কৰ্ণেল ইগৰ কোৰোটচেঙ্কোৱে কৈছে যে, "কিম জং উনৰ দ্বাৰা আমালৈ আগবঢ়োৱা সহায়ৰ হাত আকোঁৱালি ল'বলৈ আমি কুণ্ঠাবোধ কৰা উচিত নহয়।"

কোৰোটচেঙ্কোৱে আৰু কৈছে যে, "উত্তৰ কোৰিয়াৰ ১,০০,০০০ স্বেচ্ছাসেৱকে যুদ্ধত অংশগ্ৰহণ কৰিবলৈ সাজু হোৱাৰ খবৰ পোৱা গৈছে। উত্তৰ কোৰিয়াৰ লোকসকল স্থিতিস্থাপক আৰু আটাইতকৈ গুৰুত্বপূৰ্ণ কথাটো হ'ল যে তেওঁলোক পাৰ্গত। কিম জং উনে আমালৈ আগবঢ়োৱা সহায়ৰ হাত গ্ৰহণ কৰিবলৈ আমি লজ্জিত হোৱা উচিত নহয়।"