শিৱসাগৰত আন্তঃৰাষ্ট্ৰীয় দুৰ্যোগ প্ৰশমন দিৱসৰ  লগত সংগতি ৰাখি বাটৰ নাট

শিৱসাগৰ, ১৩ অক্টোবৰ : আন্তঃৰাষ্ট্ৰীয় দুৰ্যোগ প্ৰশমন দিৱসৰ লগত সংগতি ৰাখি আজি অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ উদ্যোগত আৰু শিৱসাগৰ জিলা দুৰ্যোগ ব্যৱস্থাপনা প্ৰাধিকৰণৰ সৌজন্যত শিৱদৌল প্ৰাঙ্গণৰ সন্মূখত বানপানীৰ দৰে দুৰ্যোগত ল’বলগীয়া সাৱধানতাৰ ওপৰত বাটৰ নাট প্ৰদৰ্শন কৰা হয় ।

এই বাটৰ নাট প্ৰদৰ্শনত উপস্থিত থাকি শিৱসাগৰ জিলা পৰিষদৰ সভাপতি ধ্ৰুৱজ্যোতি মাউতে প্ৰাকৃতিক দুৰ্যোগ, বিপৰ্যয় আৰু জনসাধাৰণে লব লগা সতৰ্কতাৰ বিষয়ে বক্তব্য ৰাখে । শিৱসাগৰ পৌৰসভাৰ সভানেত্ৰী মৃণালিনী কোঁৱৰেও বানপানীৰ সময়ত লব লগা ব্যৱস্থাৱলীৰ বিষয়ে বক্তব্য প্ৰদান কৰে । 

 শিৱসাগৰৰ ৰামধেনু প্ৰকৃতি আৰু সাংস্কৃতিক দলে পৰিবেশন কৰা আজিৰ বাটৰ নাটত শিৱসাগৰ উপায়ুক্ত কাৰ্যালয়ৰ সহকাৰী আয়ুক্ত দীপাৱলী কুৰ্মী, শিৱসাগৰ ৰাজহ চক্ৰৰ সংলগ্ন ৰাজহ চক্ৰ বিষয়া চিন্ময়ী চুতীয়া, জিলা দুৰ্যোগ ব্যৱস্থাপনা প্ৰাধিকৰণৰ প্ৰকল্প বিষয়া ৰূপমজ্যোতি বৰা, উপ-নিয়ন্ত্ৰক প্ৰাণজিত দত্ত, শিৱসাগৰ ছোৱালী মহাবিদ্যালয়ৰ সহকাৰী অধ্যাপক প্ৰবীন শৰ্মা, জিলা তথ্য আৰু জনসংযোগ বিষয়া জয়ন্ত মাউত, মটক স্বায়ত্ব শাসিত পৰিষদৰ সদস্য প্ৰানদীপ মহনকে আদি কৰি বহু সংখ্যক স্থানীয় লোক উপস্থিত থাকে ।