অইলৰ আৱাসিক মুখ্য বিষয়া প্ৰশান্ত বৰকাকতিলৈ অমল কুমাৰ হৰ’ সোঁৱৰণী সামাজিক দায়ৱদ্ধতা বঁটা

দুলীয়াজান, ৩০ নৱেম্বৰঃ দেশৰ ৰাজহুৱা খণ্ডৰ দ্বিতীয় বৃহৎ তৈল উদ্যোগ প্ৰতিষ্ঠান অইল ইণ্ডিয়া লিমিটেডৰ আৱাসিক মুখ্য বিষয়া প্ৰশান্ত বৰকাকতিলৈ আগবঢ়োৱা হৈছে অমল কুমাৰ হৰ’ সামাজিক দায়ৱদ্ধতা বঁটা । উল্লেখযোগ্য যে বৃহত্তৰ দুলীয়াজানৰ সংবাদ-কৰ্মীসকলৰ উমৈহতীয়া সংগঠন সন্মিলিত সাংবাদিক মঞ্চ¸ দুলীয়াজানে প্ৰতিবছৰৰ দৰে এই বছৰো সাংবাদিকতা বঁটাৰ লগতে আন কেইবাটাও শিতানত প্ৰদান কৰি অহা বঁটাৰ প্ৰাপক আৰু বিশেষভাৱে সম্বৰ্ধিত ব্যক্তিসকলৰ নাম কালি ঘোষণা কৰে ।

এই উপলক্ষে কালি দুলীয়াজান মিডিয়া চেণ্টাৰত সন্মিলিত সাংবাদিক মঞ্চৰ সভাপতি জয়ন্ত ভূঞাৰ পৌৰহিত্যত অনুষ্ঠিত কাৰ্যনিৰ্বাহক সভাত বুদ্ধেশ্বৰ গগৈ সোঁৱৰণী সাংবাদিকতা বঁটাৰ বাবে ডিব্ৰুগড়ৰ জ্যেষ্ঠ সাংবাদিক ৰাজীৱ বৰগোহাঁই¸ প্ৰদীপ গগৈ সোঁৱৰণী যুৱ সাংবাদিকতা বঁটাৰ বাবে চাবুৱাৰ উদীয়মান সংবাদ-কৰ্মী বিশ্বজিৎ ফুকনৰ নাম ঘোষণা কৰা হয় ।

ইয়াৰ উপৰিও চিকিৎসাৰ ক্ষেত্ৰত বিশেষভাৱে সেৱা আগবঢ়াই অহা অইল ইণ্ডিয়া লিমিটেডৰ স্ত্ৰী আৰু প্ৰসূতি ৰোগৰ বিশেষজ্ঞ চিকিৎসক ডাঃ নিৰোজ কুমাৰ দাস¸ সাংবাদিকতাৰ ক্ষেত্ৰত দুলীয়াজানৰ জ্যেষ্ঠ সাংবাদিক ব্ৰজেন গগৈ¸ শিক্ষাৰ ক্ষেত্ৰত ঊষাপুৰ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষক অজিত বড়া¸ সাংস্কৃতিক ক্ষেত্ৰত নামৰূপৰ বিশিষ্ট সাংস্কৃতিক কৰ্মী দীনেশ সোণোৱাল¸ কৃতী শিক্ষাৰ্থীৰ শিতানত সাংবাদিক দিগন্ত শইকীয়াৰ পুত্ৰ পৰিক্ষিত শইকীয়া¸ শিশু প্ৰতিভাৰ ক্ষেত্ৰত আয়ুস্মান শইকীয়াক বিশেষভাৱে সম্বৰ্ধনা জনোৱা হ’ব ।

অহা ২৪ ডিচেম্বৰত দুলীয়াজান মিডিয়া চেণ্টাৰত অনুষ্ঠিত হ’বলগীয়া এক বৰ্ণাধ্য অনুষ্ঠাত এই বঁটাসমূহ প্ৰদান কৰা হ’ব বুলি সন্মিলিত সাংবাদিক মঞ্চৰ সাধাৰণ সম্পাদক প্ৰাঞ্জল শইকীয়াই এক বিবৃতিযোগে জানিবলৈ দিছে ।